零九初次羽毛球

今晚去左打羽毛球，不過係公司填自己個objective同goal攪左好耐，差唔多七點三先走。打八點，唔係好夠時間食飯，未食完就上去拎場，果陣都已經過左八點。自上年九月免費時段之後，一直都好似只係book過一兩次，因為好難book，加上訓晏左，唔早過七點醒根本唔會book到。八點二去到個counter，好在同Peter未食完就上左去拎，如果唔係又會俾人搶埋，阿姐話入面有人想拎。而家book場艱難，入到去八個場係得我book果個係自己係到玩，其他果d大半都係同一色系的人係到練波，而且仲想食埋我book個場。俾左錢遲左就俾人拎，真係點可以咁架…

雖然我都知會有一批人專幫人book場，但係都不致於咁過份，大半都俾團體book晒，以前都仲有見到好幾個場都一家大細打，或者放左工打，而家咁樣，作為打工仔的我地想做運動都變得好難。如果唔係搵日特登早起身book，都唔會打到。不過都有7個人放飛機，係阿亮叫多6個人黎…雖然佢地吹水多過打…已經有三四個月無打過，起手好慢、跑又慢、反應又慢左，有時又睇唔到個波，真係差勁。走果陣出面跌到十幾度，一冷一熱，好彩無冷親。