出糧啦…

雖然唔係第一次出糧，不過點都係畢業後第一份工的第一份糧，高興一下。今日亦係第一次跟PM出去見客，由頭到尾都係PM同個客係到對Requirement，間唔中只有一兩句插咀，唔係好敢出聲因為驚講錯野，Client果邊經常都講得勁快…好難跟，PM果邊就好有技巧咁降低Client的要求，見完個Client，就收工Loo ︰)。搭車其間得知PM係公司做左好多年，不過睇佢個樣完全唔似做左咁耐，唔知幾年後我會去左邊。做Workflow的Project，可以睇到人地公司的架構同埋運作，不過都係咁o岩個Project係咁的要求。

兩個星期，仍然對公司的感覺很新，同同事始終無乜兩句，除左後生D果D，同埋比我新的新同事之外，總覺得好難開口跟上佢地的話題，食飯的時候倍感壓力，一坐錯呢…… ︰D 另外就係食飯好貴，佢地去親果D都貴ge，今日同PM講話想帶飯，佢話佢以前都帶，但係慢慢成日要去Client到，個飯會成日Waste左，都係ge…不過我最快都係下個月中先落Site Config，間唔中都可以帶下飯食。

諗番Intern，其實真係好開心，即使間唔中會做到夜一夜，間唔中會忙下，不過有一班好好的同事，間唔中一齊係Pantry"Jump"下水，又可以係Notes吹下水，雖然而家張台大左，又有板圍住自己，不過Working hour無人出聲，覺得有D疏離，而且我太高，塊板又唔夠高……

PerlScript

昨日請了一日假，要係Probation請假，仲要係塊board到show出黎俾全公司人知我請左假，真係唔係咁好，不過無辦法啦…唔請又唔得。請左一日假之後就要追番D時間黎跟個Project，呢兩日係公司改緊一個好大…用PerlScript寫的program，未改過咁大的PearlScript Program，subroutine分得唔OO，Menu又只能提供有限度的支援，改左成日想show少少野都show唔到，仲要聽日就要做起個Prototype，用緊部機又慢，不過改下改下時間過得好快，希望聽日可以做得晒啦…

Weekend

終於都等到Weekend啦！呢個星期的工作終於都完左啦…慢慢適應左係公司做野的氣氛，而家做落無乜問題，不過暫時都只係噤噤制寫少少script，同我初初諗的有頗多的分別。返工遠，返到屋企好攰，慢慢開始覺得…放左工之後都唔會有好多時間做其他野。

旅行之後都只係間中點下用左幾多錢，手信都只係點過下，發現無乜買俾自己的野，除左條可以一齊食的肉腸，同舊Cheese，肉腸唔放得耐，如果想食就要搵日約出黎去胡子到食左佢，唔好好似上次咁出到黎唔俾係人地舖食，不過我會係佢過期前食左佢。除左食得的野，好在留俾自己的野仲有呢樣︰每去一個名勝都有一部金幣機，見到就買一個，除左一個要唔記得歐元三蚊定五蚊的無一齊買，基本上見到有都買左佢，有兩個係即刻壓出黎，一出黎果陣仲係熱的，其中一個仲要係用真的英磅壓出黎，感覺上有點浪費，不過可以見到佢壓的過程，儲左佢地至少都會記得自己去旅行去左邊到，希望會越黎越多啦︰)。

What a mess...

呢兩日的感覺一直是這樣，放假的感覺未完，返黎之後仲有好多野要執，唔夠訓，返新工。面對新的工作，同Intern的感覺好唔同，再不是以Student的身份工作，做錯野學野學得慢就唔係咁好，工作環境入面又沒有一D差唔多年紀的同事，整日也沒有說過話的感覺實在唔係好。不過諗諗下第一日做Intern都係咁，只係一開始的時候有另外的Intern可以傾計，面對新工作新環境只有一日就在抱怨，真差勁…希望只係唔夠訓，發發脾氣…

上班的第一天

由於時差的關係，昨晚一直都睡不著，點幾訓係張床到，典到六點先訓，訓一陣就起身返工，第一日返工就勁無精神。去北角用左個半鐘，沿途都無機會訓，早左三個字到公司門口，未到九點一個人都無…等左一陣就入左去。公司大唔大唔緊要，坐係我身邊的人今日唔係SL就係AL，坐左成日都無講過野。到食飯果陣PM請食飯，雖然話係歡迎我食，不過我都無乜機會講野，一直就只有幾個人傾計，其他人都無乜出聲，又無人問我野，我真係唔係好識同o岩o岩識的人溝通，一食完大家就散得好快，講多謝的機會都無。返到Office繼續呆坐，無訓過睇spec睇到釣魚，第一日返工就咁過左…

現在的工作，就是Config佢Develop左的Software，說實話是很難做，因為要Config的野太多，有D野又唔係好明，不過不竟是第一日，還是看看之後的路如何，始終都想試下…手頭上仍有Interview的電話打黎，現在等待的或者係機會…

回家了

終於都結束左十二日的旅行喇…真係唔係咁捨得，十二日入面去左英國、荷蘭、德國、比利時，去左好多古舊的街道，好悠閒，咩都唔駛諗唔駛煩，雖然好多時都要趕火車，不過感覺真係好正，未去過歐洲，對一切的感覺都好新穎，除左地鐵站之外，周圍都有好靚的景色，有機會的真係想再去。

琴日搭左十一個鐘機，返到香港都差唔多六點，執埋D野，食埋飯就訓，時差好似唔駛適應咁，不過起左身就唔係好肚餓，可能慣左係果邊呢個時間係訓緊覺啦…太多相啦，Up住少少上黎Share下先，要等所有相機的相都Group埋再揀多D放上黎。

準備

要去旅行Loo，今次旅行我都無乜點出過力，都係靠Sharon Plan行程，Book酒店。今日食完Lunch就出去買大家Share黎用的野，同買埋歐洲的旅遊指南，上次係IELM拎到的一百蚊書卷終於可以拎出黎用，不過D中文又有城市地圖的書都好貴，百八蚊本 =.= 商務真係厄錢，之後就返屋企喇…一返到去我老豆就同我講︰「你阿媽又走左出去……略」，唉~次次我去旅行都係咁架，上次去完台灣返黎，阿媽又走左，今次未去又走左，好在今次都唔係鬧得好勁，五點到阿媽就返左黎…

之後就繼續執野，為左節省部份的酒店開支，我帶埋張卷住的露營地舖，放左佢入個背襄到，就無左三成的位置…放埋D野入去都已經滿左，簡直係趕絕手信 @@，不過到返黎果陣應該會掉左D野去，到時應該會仲有位放野入去…希望無執漏野啦~~

歸家

今朝六點半就起身，七點幾就開車返番科大，好耐都無試過係雨天渣車，仲要好大雨，返到科大的時候八點幾，拍左架車係坑口就返hall係咁執野。Hall入面的野已經比起Year2走果陣時少左好多，除左多了幾部Figure…執執下出左去尖咀拎野同俾野，然後又返Hall繼續，多得胡子同2Ming，搬野先咁快，兩轉就攪惦晒，不過塞到成車都係野，之後食完飯就渣車走Loo，架車好重，落斜勁快，上斜勁慢 =.= 返到屋企九點半，八個字就返到屋企，然後就執野執到而家，不過都仲未執完，砌番部機，執好晒D衫就停手，聽日先再執，好攰。

應該都唔會返番科大的Hall，上一次搬野返Hall都無乜特別的感覺，今次唔會再返番去，唔會再成班人齊嘩嘩係Hall煮野食，有好多野之後都會比較難去一齊做，有好多Year1做的野諗起都會幾好笑，雖然今年住Hall已經無Year1的感覺，生日再無人衝去你間房扔你落水，D人個個又鎖晒門，連用Desktop都俾人覺得奇怪，條Wing變得又靜又臭，不過都有D唔捨得Hall的生活，至少係Hall朋友的距離好近，而且上網都快D啦…不過生活模式總會不停咁改變。