週記

有一星期沒有寫過Blog，應該慢慢會變週記，不過都係因為夜晚成日出左去食飯，夜左返屋企，不過呢個星期還真是充實，bowling之後badminton，今日唱埋K Lunch，揮霍一週，還好今天出糧，救濟一下。

整個星期家裏都沒有冷氣，頭兩日根本訓唔到，一來之前打機打得太夜，唔慣早訓，二來果兩日都落雨，成日俾雨打醒…不過都仲要等多一個星期先安番晒D冷氣，希望下星期唔好太熱，就好啦。

星期五晚

工作一週，星期五係最開心的時間，出去玩之餘，至少未報D咩野讀，仲可以星期六訓晏D，同阿聰慶慶生日，一班人食完飯之後，就幾個入左屯門係胡子到打Wii，食完飯返到去都十一點，執埋屋企部Wii過胡子到，就十二點打到今朝五點，自離開Hall之後，好耐都未試過一班人一齊打機打通宵，還真是覺得有點痴線，不過玩得最耐都係GC隻Mario Kart，四個人狂玩真係好Happy！玩Wii玩到手軟之後，玩佢仲可以俾隻手抖下…不過去到五點真係好眼訓，訓左一個鐘就搭輕鐵返番屋企…時間又再一次日夜癲倒…

新開始

今日返番闊別一年的工作地方，是仕途的新開始，回到之前工作的部門，感到桃花依舊…不過又不是人面全非o既…只係好多空位，熟識的朋友們都上一層了。雖然轉了個近D的地方返工，不過起身的時間差唔多，搭車的路線一樣，只係早左落車，希望唔會有一日我未訓醒咁搭左去香港站。Anyway第一日返上去，介紹也唔駛，就坐係位到，乜Acc都未開，只好睇Doc，唔記得左Proxy係乜，開IE乜都去唔到，不停咁睇，時間就咁過，睇晒份Doc咁滯。本來諗住會有呢一層的人叫我一齊食飯，結果十二點放Lunch D人走晒，應該無人會當我係新同事，哈…當我好似以前咁帶飯吧…

多謝阿May的邀請，Lunch Time 同大家一齊打Bowling，好耐未打過，對上一次係大半年前，又無做運動好耐，好低分，不過一班人Lunch咁一齊玩幾開心。然後，又再次繼續坐係到睇Doc，同阿亮吹左陣，換埋己部機D Keyboard Mouse，每次用新機個Keyboard 同Mouse總是最舊的，然後坐坐下食Tea，多謝Stanley請食Tea welcome我，之後咁就過左第一日，Anyway看來準時走的日子將會遠去了…

Last Day

今日正式咁離開左公司，不過撞正掛八號風球，最後果半日都過唔到就走左，結果連買西餅的時間也沒有，最後就只有留了個Email離開公司，稍稍的來，稍稍的走，不過走的時候也有同事祝我好運，希望將來的日子會順利啦…

因為打風，回家的路上濟得水洩不通，諗都無諗就搭左地鐵去中還轉車，多人得排到出扶手電梯，失策，等左好耐先上到車，去到荃灣，又要等巴士，巴士未滿，連空位都仲有，排前面的人都唔肯上車，D人點解會咁架，差D走左架有位的巴士，好在跑得快…最後一日咁就過左，緊接住的就係星期一的近開始…

Wii

今日終於都買Wii了，價錢在預算之內，本來諗住第一個月出糧就買，不過剛去完旅行，仲有出半個月糧，扣扣埋埋都唔係淨好多，最後都係等多一個月，好在機價唔貴，貴的反而係一Set手制，第一隻Game就玩SD Gundam流星鎚果隻，真係好正，玩到手到攰晒，不過係玩的同時發現…我一開部Wii，我就上唔到網，因為我用緊和記Wireless，個Wireless的receiver放左係Wii附近，一個用Wireless一個用藍芽，估唔到咁都會撞囉=.=，結果要放個Wireless Receiver入房，不過放左入去，好似收得好左，條線快左，玩Wii又影響唔到，真係非常好。不過以後我就會更易經常被Penetrate power強的Wireless穿過…

請辭了

今天正式遞交了辭職信，正式向公司提出請辭，下星期正式離開公司。已經考慮了很久，昨日與PM相討的時候，亦相討了很多，相討的論點也在於公司多野學，的確係我之前諗左好耐的問題，說到有甚麼事可以跟他說，的確我沒有跟他討論過工作上的事，再三叫我考慮一下，考慮考慮又考慮…最後還是決定離開，第一份正式工作，第一次請辭，雖然只留了短短個幾月的時間，但剛剛才感到與同事混熟，就要離開了，雖然大家也叫我唔好咁諗…不過感覺不太好嘛…

兩邊的路應該是不同的，一邊學的係多方面的Technique，甚至於與客人「講數」的技考，雖然可能咁啱…只有我這個項目可以跟客人相討Requirement，而另一邊，曾經呆過一年，見的野是而家間公司唔能夠見到的，至少不會見到電郵由午夜寄出，而家公司返工可以遲一小時，放工可以很早，落Site返工自己Keep Track咁，是「好處」令我覺得唔應該離開，還是真係多野學？

離開，或者係我變得膚淺，向錢看了，請辭時PM還問那邊待遇很好嗎？ER…不知怎樣回答，因為他沒有離開過公司。也許是將要離開，PM那邊沒有多話要跟我說，還有一星期待在這裏，相信其他SA或者PM也知道我要離開，至少問我Server野時還加了句︰「你走果陣…」第一次請辭，還是太在意吧，或者我開始亂諗野…=.=