Sense

糟透了

2009-12-16T09:15:00.001+08:00

糟透了…就是最差勁的一天。

小寫

2009-06-16T23:30:00.001+08:00

去完東京之後，都有兩個月無打Blog，好攰，唔想打…就係咁簡單。去完旅行之後就一直忙，為了那個改期又改期，加人又加人的Team Building，為了那個沒有Schedule的conversion，加上手頭上分俾同事做的Development Item，為了那個突然而來的Setup，想輕鬆D都唔得，當然未去到老闆忙碌的地步，不過稍微偷懶，做慢少少就得變麻煩。

時間唔夠用，一直Keep住返工坐係到做到放工的情況，望一望錶一個鐘過去，望一望錶又收工。然而大部份時間用左係Team Building，開會時間其長，準備時間「奇」多。好在Team Building完左，雖然Arrangement頗差，但至少係我眼中不過不失，當然大老闆有所要求。本來完左以為會多D時間，又殺多樣野出黎…今日繼續做唔熟手的野，只能說做得好慢。永遠有一個諗法，想早D走，返屋企再做，返到屋企，想抖抖聽日再做。最後只能迫自己做。

東京六天精華遊

2009-04-18T15:29:00.004+08:00

日元急升下，還去了日本一躺。四日連續復活節的假期下，再請了三天AL。到了東京，四處逛逛。從未去過日本，因為很貴，加上言語不通，覺得好唔方便。今次同Vinna、貓貓去，有貓貓變左無語言障礙，不過就要Push佢問野。四月去，當然去睇櫻花喇…當然我都講過去日本唔係淨係睇櫻花，所以今次其實都用左兩日係都外的兩個地方，河口湖同鎌倉。整個旅程除左留係東京的日子感覺不太爽之外，係郊外都非常好。

今次睇櫻花只係Bonus，因為今年早開，去到果陣其實都已經花落緊。如果睇以下的呢張相，會見到有D枝節都無左花瓣囉…唔知係咪成日係到試點影先靚，見到櫻花好似無乜感覺咁…係櫻吹雪果陣有點興奮的感覺，所以拍下了片，放上Facebook。相信公司的同事先睇到晒無人版本的全部相片，如果有睇過，其實會見到我唔係影左好多，大慨因為好似點影落去都有d奇怪，如果唔係影到櫻花滿佈，好似好難睇咁。

雖然影得唔太好，但係比較喜歡以下兩張，因為唔係淨係得粉白色的花。

呢張如果拎底少少會好D，不過影完呢張之後就好大風。

呢張左手邊的花瓣都甩晒…實則要搵到一枝比較好的樹支，而用支17-35能夠捕捉到的，的確有點困難。每次都舉高手去影，加上大風，影到已經覺得蠻好。好在八點左右到，陽光唔係咁猛，過左十一點，陽光猛，影覺去就黃黃地，加上風再大D，花實在難影。

如果只係將今次旅行放重係櫻花到，就真係幾浪費。東京夜景其實都唔錯，大抵因為地震的關係，大部份的樓宇都唔係咁高。要高高咁睇到東京鐵塔，其實都只係得兩三個地方揀，呢次就上左六本木的Tokyo City View，本來可以唔駛隔住玻璃見到全景，可惜外展望台七點半就閂左，隔住玻璃影左幾張先影到呢張咁樣的。

其實好似比起係東京鐵塔望出去的感覺好，因為除左東京鐵塔之外，都無乜大型的地標。

東京鐵塔下…

有一日去左三鷹市，係成個旅程唯一一次入左美術館，的確係幾值得去的地方，尤其係館內的設計，加上好幾部大型的展品解釋動畫…唯獨館內不能拍照，下面呢張都係出面影，多得支Wide鏡先影到。如果有CPL，相信好方便。

東京的市內太多人，多人過旺角，尤其係涉谷。唔係咁鍾意咁多人的地方，加上遊客太多，到處都聽到廣東話、國語等等，同平時落街無乜分別。所以去河口湖同鎌倉，感覺係幾舒服，雖然鎌倉都好多人。

係日光無咁猛的朝早就出發去河口湖，十點幾到，天空萬里無雲，太陽正正係上方，都唔知點影相好。不過環境的確好，係多鬼佬，行一陣就見到鬼佬踩單車經過。到步第一樣就係唔知去邊，無地圖，咁啱又有觀光巴士，就上左車，都未睇個時間表。係河口湖觀光船個位就落左車，親陽光未係最攞命果陣就坐左船。好在都影到富士山同湖並列的相。然後就上左天上山影左呢張Pano。

富士山，唔知點解得佢有雪咁。雖然睇落去好似唔係好高，其實只係因為佢太闊。點講都係第一次見到雪山。

鎌倉，或者係之前諗太多，去到無想像中咁舊，如果舊D可能會開心D，不過如果影櫻花黎呢到都非常好，佢係大街的中心有一條兩邊都種左櫻花樹的路，如果櫻花滿開係中間行都幾靚，不過我地係尾尾第二日去，櫻花都無晒。係呢個市無高樓大廈，主要都係黎睇歷史悠久的神舍，如果走入民居，會見到日劇經常出現的屋仔。

當然，睇景之餘，都花左唔少錢係食果面，食左好正的毛蟹。

都食左好正的咖喱冷烏冬。

當然唔少得拉麵，仲有好Fresh的豆腐懷石料理。如果再去多次日本，就唔會長時間係東京，除非有野要買。

新鏡

2009-04-04T23:32:00.003+08:00

最近都好少打，因為返屋企都仲忙緊，間唔中要執下公司出Newsletter的相，搵Team Building的Game咁。應該係上上星期買左呢支鏡，之前果支16-85賣左出去喇，雖然賣的價錢唔係咁好，又要被買家壓價，不過都賣左。16-85個range真係好好用，而且成像好好，只欠光圈略細，好多時快門唔夠快，不好室內使用。於是就買左呢支…

Nikon的金廣角，當然唔係同新果支14-24比，果支鏡口成個魚眼咁。現在仍然熟習緊支鏡，即使佢有幾好，都要適應，始終一路都用緊16-85，又有VR。而家隻手要定d先得。

17-35中的35mm~

黃昏下的天空~

25cm的對焦距離，細件的野都影到好大，影食物就最好不過喇。

再入·南生圍

2009-03-21T23:13:00.002+08:00

天氣差少出去影相，今日再入去南生圍影相，都係佢俾火燒過之後第一次入去。全程拎住支35/2真係影得唔多相，都係影細細件的野多。

呢隻狗已經係影的野入面比較大的一樣…

Crop張相，不過原相花瓣俾風吹郁左…

朝早入去，無乜人，真係幾好，係爭在個天無藍色，成個天都係俾雲遮住晒。雖然呢個星期花展都仲開緊，但係人多過花，真係唔知入去迫黎做乜，去下大自然的地方，何樂而不為。

可惜有幾片土地燒左，唔知點解火頭唔係連埋一齊，唔明點解D人放火…

零九初次羽毛球

2009-03-13T23:50:00.000+08:00

今晚去左打羽毛球，不過係公司填自己個objective同goal攪左好耐，差唔多七點三先走。打八點，唔係好夠時間食飯，未食完就上去拎場，果陣都已經過左八點。自上年九月免費時段之後，一直都好似只係book過一兩次，因為好難book，加上訓晏左，唔早過七點醒根本唔會book到。八點二去到個counter，好在同Peter未食完就上左去拎，如果唔係又會俾人搶埋，阿姐話入面有人想拎。而家book場艱難，入到去八個場係得我book果個係自己係到玩，其他果d大半都係同一色系的人係到練波，而且仲想食埋我book個場。俾左錢遲左就俾人拎，真係點可以咁架…

雖然我都知會有一批人專幫人book場，但係都不致於咁過份，大半都俾團體book晒，以前都仲有見到好幾個場都一家大細打，或者放左工打，而家咁樣，作為打工仔的我地想做運動都變得好難。如果唔係搵日特登早起身book，都唔會打到。不過都有7個人放飛機，係阿亮叫多6個人黎…雖然佢地吹水多過打…已經有三四個月無打過，起手好慢、跑又慢、反應又慢左，有時又睇唔到個波，真係差勁。走果陣出面跌到十幾度，一冷一熱，好彩無冷親。

大潭大霧行山之日

2009-03-10T22:03:00.002+08:00

有兩個月左右無行過山喇，今次去左大潭…天氣不太好，一路上都煙雨濛濛。先係鰂魚涌地鐵站出發，約好十點半，不過次次都唔會準時架喇，差唔多十一點先起步。今次有胡子的中學同學加入，一大班人行山，不過其實都係分開左兩批黎行。一路上都係斜路，沿途有好多帶狗人士同行，狗隊不時係身邊穿插。行左無耐就已經去到起霧的地方，開始走入霧裏面喇。

再行左一陣就到左頂喇！其實都唔係最頂，見唔到天文台的觀測站，不過見到一大班奧比斯慈善行的參加者，上到黎先知佢地有一部份的路線同今次我地行山的路線一樣。然後我地就繼續行，好快就到左大潭水塘。同時間，拍下這張Pano，影少左一兩張，駁唔埋不過都幾好。

走果陣影下路邊的護土牆，有時好鍾意影下有草係部牆生出黎的相。
離開左石屎路，踏上濕濕漉漉的泥路。因為落過雨，泥變到好痴，踩入去好，感覺非常差，仲要攪到條褲都有泥。不過痴漉漉的感覺好快就過去，好彩無人「線」低。

離開左污漕的路段，就搭車去左西灣河果邊食下晝，一路上我只靠朝早食的燒賣，其實餓左好耐。難得去到食飯的地方，可惜下午茶的份量實在太細，價錢也唔太化算，無得揀，有得食就夠好了。走果陣經過葛量洪號滅火輪的展館，上去逛逛。其實之前都有諗過去，不過好遠加上唔知點影。果然，唔知點影…

計計計

2009-03-07T14:53:00.003+08:00

前兩日開始計算對上六個月的洗費。很貴很貴，似乎由上年七月開始，一直都係入不敷支。去多左旅行，買多左貴野，近排仲有諗過買多支鏡，睇黎都要停一停，盤算下幾時買先好。當然上半年並唔係全份糧拎晒去買野喇，仲有一部份用左係屋企，俾屋企既。瘋狂的購物令我呢半年間的儲蓄都無乜進脹，還好最近從Share Option退回了錢，就算心急去買支鏡，都可以用果一部份。

廣州長隆一天遊

2009-02-28T23:55:00.003+08:00

今日上左廣州，去長隆歡樂世界，約好了八點三係上水等，不過八點半左右先出發。本來諗住搭九點四班和諧號上廣州，但係不慎我買錯飛，攪到走左班車，好在可以搭下一班，不過要開車之後先安頓好坐位，因為要空位先坐得。

十一點半左右去到樂園，天色陰陰沈沈，不過唔緊要，唔係黎睇風景，這是係門口影的大合照，因為俾部機人地影，但係又唔識用，要等胡子部機張合照。

一開始真係唔知玩乜好，所以去玩左無咁刺激的野先，除左果個貌似俾細路仔玩的墨西哥草帽之外。雖然係咁，呢個都唔好睇小，真係升得好高，隔黎又起左D好近的野，攪到好似差D撞埋去咁。

之後玩了碰碰車，再玩飄流…玩飄流果陣因為睇少濕身的程度，所以有Kimmy、Vinna同胡子都無買雨衣，結果隻船經過水簾、水槍果陣佢地都濕晒。其實係我提議唔買的，不過最後我都買左。真係Sorry…

跟住就去左食飯，都幾難食，加上見到佢的煮食過程，都唔係食左好多，坐左一陣就再去玩過。因為啱啱食飽，所以就睇4D影院，被噴到成面水，又俾人篤背脊，然後又玩左陣碰碰船先，之後就去左玩呢個喇，垂直過山車，不過無點影到佢垂直果Part，呢個真係好正，因為未玩過，加上垂直果Part好刺激，呢個真係最值得玩。

玩完呢個，就去左玩摩托過山車，我同2Ming坐車頭，真係好似渣車咁，好快好快，但係實在太快，話咁快就玩完。跟住迫左貓貓玩個輕KAN D的過山車，等埋胡子同Kimmy玩個大攞錘之後就離開樂園。

去左財富果邊食飯，因為唔知去邊食好，加上近火車站，所以去番上次間椰海。雖然食得比較貴，不過都幾好味丫，希望大家唔好介意，下次我會做多D Research先，去食D平D又入得口的野。

新鞋子

2009-02-27T22:28:00.002+08:00

好耐都無買鞋，早幾日買左對，之前果對著左近兩年喇，舊Post都有Post過佢，而家就變左咁的樣喇，呢對鞋陪我去左歐州四國、台灣同菲律賓，因為無好好保養佢，話咁快就變左咁樣。

所以前排買左呢一對，因為好友極力推薦。呢一對係復刻版的跑鞋，係阿甘正傳入面果對。著落去好舒服，不過著的第一日已經俾人踩左幾次，攪到好污漕咁，呢張相係開盒之後影的，順面練習下打燈影物件。

我諗唔會咁快變污漕掛…

So Man & Hok Man's Wedding

2009-02-22T23:30:00.002+08:00

同Tenson一家人食完飯之後，就去左飲喇。今日呢對小學同學終於都結婚喇！真係恭喜晒！從此有人就被綁住…快快樂樂咁生活。多得大家的努力，一路keep住咁約出黎玩，先可以咁齊人。

見證住兩個人簽名，非常幸福。不過其實一路大家都等食飯，哈哈。真係辛苦晒對新人，滿場走，仲要食飯果陣俾我地捉住影相。呢張相執過曾先生對眼，希望大家睇唔出喇。

Lunch with Tenon's Family

2009-02-22T16:21:00.000+08:00

今日獲邀同Tenson一家食飯，見下佢出世兩個幾月的女。約下晝一點，十點醒，一醒左就出門口，結果好多人遲到，早知訓晏D~哈哈。黎到果陣都未見到真人，淨係可以睇片，食左一陣終於都出現喇。大家一見到就爭住抱，好彩Jenny唔怕人，當然我都唔爭在。

好耐無抱過BB，抱起手真係幾驚，以前就話成日抱，而家真係生晒手，不過抱起佢，又無乜野咁。

Jenny BB係咁望住阿Paul，好似好想佢抱咁~

最尾同Tenson 合照一下先。小Jenny要快高長大！話晒我地買左咁多野俾佢玩。

Cheer Chen 2009 Live HK Concert

2009-02-21T23:59:00.000+08:00

今日去左睇陳綺貞演唱會，應該係紅館裝修之後的第三場，多得May姐幫手，買到兩張飛，不過始終都無佢地用果張Priemium卡買的位咁正中。紅館裝修後同裝修前其實無乜大分別，係位唔同左顏色，坐得舒服左，個Pan又高左，企起身果陣唔會有跌落去的感覺。

坐得好高好高，又幾邊邊位，多得Donald支70-300，係正常的位置影到呢張，呢張顏色同對比都幾好，唯獨唔係正面。

好在中間佢突然升左上黎，影到呢張！

成個Concert的氣氛真係好正，一路都慢慢咁製造氣氛，又無乜「與歌迷對話」，中間清唱又正，可惜時間話咁快就過…最尾唱埋首慢歌就完左。希望下次佢的Show我都睇到，又好睇喇~

二周間

2009-02-21T15:02:00.003+08:00

不知不覺間過左兩個星期，當然係公司唔係咁諗，呢排返工的心情都唔係咁好，一來好攰，二來做野果陣成日好似夾左係中間咁，即使工作量不致繁忙，但係keep住無咁心機做野咁，或者係公司太多負面消息吧…希望到三月，有業績公布果陣會好D啦。

天氣唔多好，無咁積極出去影相，貼番幾張係之前影落的蘭花先，雖然影得唔係咁好，不過都好少影花，算係咁掛，其實根本唔識影。

下次影果陣會再收光圈，等景深好D。

維園上的辛勞工作

2009-02-08T19:18:00.004+08:00

星期二食左個怪味的中式牛柳飯，之後就病左…星期三拎左半日Sick Leave，第一個Sick Leave，雖然係半日，不過都依足程序，交左醫生紙又上報左。雖然可能同果個飯有關，不過都應該因為星期二去左聽馬拉松的Briefing，俾個風扇吹左成晚所致。

話說應承左去幫手做馬拉松的Helper，星期二放左工就過鰂魚涌聽Briefing，與其說是Brief俾Helper，倒不如說是Brief俾全部的工作人員，係兩個鐘的Briefing入面，我相信只有最初的半小時是必須的，其他的有關資料，大慨知道便可。於是一聽聽到九點半，跟手食飯，返到屋企好在只係十一點半，不過第二日就病左。

一直都諗緊會唔會病到星期日，好彩星期五開始都無乜事。因為要四點九去到維園，所以好早就訓左，不過都只係訓左兩三個鐘就搭西鐵出去。雖然西鐵3點會早開接跑手去，不過輕鐵無開，三點出門口，行左四個字去到西鐵站，趕上第一班車，唔知點解好多人係美孚轉線，當然唔理佢地先喇，之後係東涌線撞到小悅，之後就一齊過去。係香港站等左好耐，零晨四點幾，人數頗多。

到左金鐘站，根本多人到迫唔到入去，唔知係美孚轉車的人會遲幾多。無耐之後到左維園，一路都係俾人潮推左上去天后出口。到差唔多遲到，Join埋Vinna先入去維園。結果第一句係有人問，點解我地會咁早黎… Anyway，等左一陣之後第一樣做的野就係，派呢D俾人。

不過似乎唔係好多人拎，拎左的又放番低，大家手上拎的都係相機，因為第一批10Km的跑手就返到，而家先係五點八…襯等緊派野果陣，遠遠咁影D人跑返黎先。

第二樣做的野就係帶人由天后果邊行到去終點線的打氣區，初初黎的人都唔係好多，見到有巨型吹氣棒急步行過，影下來，雖然有點手震，不過這張有點攪笑，當然前面無人就最好喇~

之後就不停咁由天后到打氣區之間走黎走去，一行就由六點幾行到十點…唔知行到幾多轉之後，就被點派去做另一樣野。基本上由五點開始都無坐過，一路都係行行行，企到點零鐘。當然本身的工作人員也是，不過行左咁耐企左咁耐，真係仲攰過上山。

終於都差唔多完，係Media Booth影番張相先…

記者們亦眼見差唔多完，係Media Booth下擺陣，不過只容Nikon。本來後面有支大白，都拎走埋。

好攰咁，食埋飯，四點記先返到屋企…真係應該係大學生先做的事。

冬天下的白坭

2009-01-31T22:46:00.000+08:00

今日去左白坭一轉，四點半左右出發，五點左右就到左。查過天文台的日落時間，仲有一個鐘太陽先日落，係呢個時候的太陽係最耀眼，從正面看著西邊，差點睜不開眼過來。睇日落的地方，由一河分隔，每次黎都想過去多D紅樹果邊，不過因為遲左，次次都過唔到，只有一次過到去，因為果陣仲可以係另一邊行入去。

正好有隻狗仔行過，於是影埋佢。睇黎野狗的數目有增無減，係坭灘上面都有兩隻狗仔係到，之前黎果陣都唔見有。唔知係咪天氣凍，今日入黎果陣都唔係咁多人。

不過太陽好快咁入左雲果邊，見到咁都係走喇，免得之後又要唔知等幾多班車先出到黎，走果陣都仲有人趕緊入黎睇，可惜佢地實在太遲喇…或者大家黎之前應該睇下天文台網頁。

這是牛年的賀歲煙花…

2009-01-28T11:39:00.000+08:00

牛年話咁快就到喇，終於唔駛坐太歲。年年都係隔住個電視機睇煙花，今年唔再係咁喇。今日衝出屋企，係現場睇，同埋影煙花。本來諗住上獅子山影，不過天公不做美，新年開始就好凍好凍好凍，加上潮濕，多雲有微雨，上山影煙花之旅告吹… 經多番商討，最後係年初一的夜晚就決定都出去影，最初的決定都係上寶馬山，不過係兩點訓之前見到一個Post，最後都係決定去銅鑼灣影。

未去過早D去，四點半齊人，慢慢先行出碼頭，搭船仔去堤壩。五點就到左，坐一陣就十蚊。五點左右到，未有咁多人，呢個位唔係正面，加上好受風向影響，一個唔該煙花的煙就可能就會迎面吹埋黎，所以唔會有太多人。不過影煙花都幾好，如果唔係一心想影成排。八點先開波，係堤壩上的日子真無聊。

第一次影，唔知煙花有幾高、幾大，一開始拉得好遠，煙花好細個@@，之後就Zoom番近去到下面果張咁。未影過，只好背人地的Setting，煙花係咁放邊試下又邊轉下。

一開始都無乜煙，慢慢IFC就被煙遮蔽…跟手連會展都無埋，於是再拉近D。

呢兩張應該係最靚架喇。不過今年煙花船著火，真係唔好意頭。原來好早就著火，都係睇到佢出黑煙先知佢著左火，好在無人受傷。

影完之後就去左鋸扒，雖然我無鋸到。返到屋企都十二點，揀埋相執少少就三點，攪掂晒先訓。

Enhancement to Camera

2009-01-24T23:29:00.000+08:00

係去完大棠返黎之後，就去左買閃喇，很貴…如果唔係SB-800停產，如果唔係當初的猶豫，我應該買左SB-800喇，不過世上沒有如果，而家買左SB-900 都好好玩，雖然仲未識點玩。

好大枝閃光燈，安左落部機到，真係有D誇張~

哈哈，要慢慢練習下先得！

寒冬下的荔枝莊

2009-01-24T22:58:00.000+08:00

呢一日係新年的第一日假，年廿九。天氣好凍，本來燒野食係一件樂事，不過今日我地走進荔枝莊，睇動物、摘士多啤利、再燒野食，係寒風下，燒野食的火堆成為今日最重要的東西。大伙兒相約十一點係朗屏等，不過有人遲到，雖然我都遲到…於是去左隔黎街市食左餐好重要的早餐，然後齊人再出發。

搭的士入左大棠荔枝莊，去到果陣有個伯伯同個佬係到歡迎人，睇黎天氣太凍，無人入黎，周圍都無乜人咁。四處逛逛，見到小朋友玩的野大家就親無人上去玩下，結果玩到有小朋友黎都未玩完。之後去左睇鴕鳥、中華鱘、一隻唔知講乜的八哥、仲有食楊桃的山羊、拉牛車的牛同埋馬，成個荔枝園都好多動物…不過天氣好凍，睇果陣都唔係留好耐，除左大家餵馬仔同騎馬仔的時間比較長。

因為係朝早入去，加上荔枝園其實都幾早閂，所以燒野食係Lunch黎ge，點左火又齊人之後，大家都唔想離開個火堆。

燒到咁上下，女仔全部去晒餵馬仔，然後我同Jason再Join佢地去摘士多啤利。企係士多啤利田上面，簡直係凍到入心入肺…風係空曠的士多啤利田上面猛吹，不過都無損摘士多啤利的興致，除左我，摘左兩粒就停手，係到影相。

D士多啤利，真係好甜，雖然唔係好大粒，但係新鮮摘的真係好好味。唔記得左係咪一磅60蚊，不過好味的野，都係貴D ge。返番去火堆，仲有Donald、胡子同阿Hei係到燒野食。其實燒野食果陣都有幾隻貓行埋黎，一來取暖，二黎係食野，呢張應該係影得最好的一張。

因為係買Package咁入去，仲有野未玩，所以用左黎換有機菜，最後拎左兩包苟幾同兩條粟米。D粟米一返到屋企就食左，好甜，新鮮的果然係唔同。

獅子山一遊

2009-01-18T23:23:00.002+08:00

又好幾日沒有打Blog，最近都成日出去，不過沒有太多時間寫下。星期日同阿圈、Donald上左獅子山，原意係為左上山影年初二煙花的Pre-Trip，不過睇天文台的預報，相信年初二當日應該會落雨。不理也罷，星期日上山的天氣正好，萬里無雲，唯獨煙霞滿佈…本來諗住上山應該會涼涼地，不過最後攪到身水身汗。

先係黃大仙出發，經沙田坳道行上去，做錯了一個選擇，就係係黃大仙行上去，一路上都係長命斜，一邊行隔黎就一邊有車行上去，都未去到起步位，已經汗夾背流。行左好似好耐先去到獅子山郊野公園的入口，然後一路都係梯級，路的旁邊間唔中都有位置回望黃大仙、慈雲山一帶的景緻。行行下去到高d的地方，已經可以見到沙田，與此同時有好多馬騮係到搵食，好在身上無膠袋。

經過一段好斜的梯級之後，終於上到獅子山頂，不過尚未到最高峰的獅子頭。

要去獅子頭係無平坦的路，要用手握住行山人士綁的繩，再踏上石級先去到。本來無打算過去，但係見到獅子頭上有細路仔，無理由唔試下，於是就過左去，呢張係過去之前望向獅子頭的Pano相，超大張…

係獅子頭影的相，可以眺望整個九龍半島，企係頂峰，左手邊係九龍，右手邊係沙田，感覺真棒。可惜煙霞真大，只能稍微看到香港島的大廈。

企左好一陣子，就走喇，因為實在太曬，加上Donald趕時間，走果陣行另一條路走，行行下可以回望獅子頭。

一路行落去就去到獅子山公園，再行就去到天宏苑，獅子山之旅就咁就完成喇。

一周間

2009-01-17T20:35:00.004+08:00

呢個星期的天氣仍然好凍，朝朝都唔想起身，返工的時間順延左，收工的時間都順延左少少。每日的工作時間都過得好快，唔知係咪天氣凍，做野慢左，已經不停咁做Sametime大部份時間都係工事，但係每次做完一個Task望下個鐘都發覺用左好耐時間。最近不停咁答人地的Query，好多問題其實都未遇過，問邊個唔知，點解決唔知，好在各方好友協助，加上不同的建議先可以迎刃而解。

星期一同印度朋友開左個會，本來無需要開會，不過佢地實在太多問題，係佢地的提議下最終就範，因為沒有太多時間Prep要講的野，而且我唔想講得太深入，如果基本野講得太多又會有引來更多問題，再者佢地只係Set場，最後變左看圖說字，不慎因為沒有太多內容，以致我講的野只捱了十分鐘……幸好有人幫手自己人問自己人野，加上佢地問題非常多，所以最後成為一個Q & A Session。一直以黎都好少同佢地溝通，成日都唔知佢地問乜野，想講乜野，對住佢地成日都要Parden前Parden後，覺得自己好似好差咁，都唔知要對佢地對到幾時。好彩星期一晚同同事一齊食飯可以開心下…

係Dan Ryan's影實在太難影合照，於時去左平時有Reception果個位影，不過係一位Secur幫手影的。

自星期一開始，每日印度朋友行的Conversion Job都有新的問題，每次有問題Sametime都開左Chat room，間唔中有D問題唔知點解明明琴日行到，第二日會變左行唔到，攪到成日都要Check佢地做過D乜，唉，我幫得太慢佢地就搵其他同事…攪到麻煩到隔黎果位。除左印度朋友，自己跟緊的Project都仲有改動，User試野又有好多問題，係咁做，不停做，總係做唔完咁。不過因為咁放工的時間好似好近咁。

星期四Ah Wong約食飯，因為應付度朋友的問題，所以遲左，去左Outback食，好似唔係叫左好多野但係最後係好飽。或者係個炸洋蔥花球太油，薯條食得太多，最後傾到十一點先走，返到屋企十二點幾。然後好攰好攰好眼訓，終於捱過左星期五。本來今日要行山，不過順延左，所以今日可終於可以訓到十一點幾，一醒左就出左去，飛左個髮。

冬日西灣遊

2009-01-12T20:17:00.000+08:00

今日去左行山，雖然氣溫只有十度至十幾度之間，但行落都唔係好凍，基本上都係邊行邊出汗，由西灣行去北潭凹(坳)，經過大浪灣的幾個沙灘，風景真係幾靚，係天氣凍左少少。水清沙幼，感覺不像香港，不竟係比較難去的沙灘，無乜人去先Keep得咁好。

之後係鹹田灣食左個晏，就一直都係山路，冬天下一路上的草都係枯枯黃黃，係中途見到有D花開左，有蜜蜂採蜜，這是第一隻用相機打下的蜜蜂。

歷時五個小時，咁就行完左，一路上有兩段路行到好攰，因為不停上斜，加上拼命追幹，攪到自己上氣唔接下氣咁。今次行山渣左車入西貢，估唔到泊車變得咁貴，埋單過百，不過因為渣車先早少少返到屋企。

二零零九的第一個周末

2009-01-04T18:57:00.010+08:00

零八年的最尾一日，打了場保齡，買了個電子防潮箱，本來打算出去倒數，不過最後放了飛機…如果唔係對面屋有人倒數，我都唔知零八已過，因為當時打機打得入神。零八年屋企比較多事發生，踏入零九，希望一切安好喇。

放假還真的太耐啦，到左零九年的第一個工作天，仍然抱著放假的心情，加上手頭上的工作就相繼出現一個個問題，工作的速度非常之慢，還好老闆仍然放假…而且Deadline未到既。完成了一天的工作，到左星期六，終於可以訓晏D。

星期六天氣很凍，訓到一點先醒，醒左之後煎了這個來吃…雪得太耐，煎左後D肉唔係咁好味。

之後同2Ming出左去，抽了這個盒蛋，相信呢個動作係突然向後加速，避開前面的飛彈或爆炸，但實物看起來看不出。

夜買肚餓，出去買了這個，其實係渣車山去西鐵站接屋企人果陣買的，沒想像中咁好，醬唔夠，食落太多魚柳咁。

呢兩日都係屋企休息，其實係天氣凍，加上隻RPG未打完，唔多想出去。

假期尾聲

2008-12-29T23:08:00.003+08:00

終於放晒今年的假期，實在太快喇…雖然放左好耐。琴日去左兩轉聚會，多謝各路好友的安排先攪得成。下晝先過左阿鬼到玩，好耐未試過一班人玩過呢D Game，好似OCamp咁，三個鐘唔經唔覺咁就過左。走之前合照一張~

之後夜晚就同番CS的大家食飯，遲到真係唔好意思，不過四個人一齊遲係過份D既…初初上去間Cafe大家都以為去錯地方，上上落落左兩次，多得管理員的指點先入去，雖然周遭的環境都好嘈，但係我地好似好靜咁。等左好耐先有野食。今次無同人影相，只影食物…

多得Jason載去西鐵站，先可以十二點前返到屋企，不過整下呢樣果樣點幾先訓。

小同聚 BBQ

2008-12-27T20:58:00.003+08:00

琴日同一班久違的小學同學係屋企燒野食，雖然係久違，但係其實我地的聚會次數有過於我同中學同學的聚會，不過今次都黎多左個十年無見的朋友。真係辛苦晒大家老遠走入黎燒野食，買野始終安排得唔係咁好，分開左兩Group人，又要其中一Group係百佳外面等咁耐，真係唔好意思。本來諗住係上黎玩一陣先燒，結果黎到屋企都五點幾，一黎都準備野食，不過呢D都係女仔做，男仔就…有D係到玩，有D幫手「透」爐。

屋企的炭越黎越多，今次買左一包炭，無開過，相信不久的長來，佢俾人拎出黎燒果陣，都因為水氣太重，攪到咁多白煙，就好似今次咁。無左把電風扇，攪左好耐都有一個靚的火堆，不過等左陣大家先上黎燒。買野食遇得啱啱好，只有水唔夠飲，真係唔該晒三位咁精明的女仔。傾傾下先知，小學已經被人幹掉，好久也沒有回去，連校慶都唔知，而家返去都唔同左學校名囉。詳談一輪後，十點半大家就走喇，走之前影番張相，又係呢個位，本來有張係燒緊野食既，不過唔齊人。

好在馬生最後都黎左，幫手車一半人走，下次再約，又唔知幾時囉。

人山人海的工展會

2008-12-25T20:50:00.000+08:00

成日都出左去，聖誕就陪左屋企人去工展會。真多人，本來諗住唔係紅日黎，但係得今日得閒咁，食左個晏就搭車去維園。未入會場已經要排好長的隊先買到飛，周圍都係老人家，當然亦有好多小朋友。沒事幹的話去工展會食下野都幾好，十蚊入場，試食都賺左，雖然我無試食過。本來諗住買D平的野食，不過都唔係平出面好多，周圍都好多禮品包，但係個包入面都包左D唔給引的野。結果最後都只係買左公仔麵，同一D茶葉，加左盒買完先睇到係爛的有機Strawberry。真係車錢都洩左…

相信係工展會取好賺都係阿波羅，買鮮果乳酪的人龍，一直都無斷過，仲多過識食的人龍。見咁多人排，都買左枝黎食下。

熱鬧的平安夜晚

2008-12-25T02:38:00.000+08:00

平安夜仍然放假，係悠悠的假日中去左睇葉問，沒有悶場的武打片，而且內容不僅只有武打成份，對比起好耐之前睇的霍元甲，呢到好睇好多。如果最尾果場個阿姐無突然間講左果句，相信會更好。係睇戲之前去左打左兩局保齡，第一局唔過一百，不過對手更……第二局連打三個全中，應該係今年最好的成績，百四分，相比起之前真係差左少少。唔知係咪渣相機渣左幾日，打完保齡之後手指握緊野果陣手碗有少少酸痛。

之後就去左好多人的尖沙咀逛逛，佳節下本來想去感受下節日的氣氛，但係只有好多好多的人，一路行一路行，係間唔中有人報佳音，雖然好多人，但間中都有影下相，無人的應該只有呢張係最好。

去到海運都已經熄左燈，雖然係咁，但係仲有好多人影相。影左幾張之後就跟住人潮離開喇。

冬天行山樂

2008-12-20T22:36:00.002+08:00

繼係力奇打邊爐之後，一連幾日都出左去同朋友食飯，星期六就到左呢個星期的重頭戲，一行人係元荃古道行山。本來約九點，雖然我都九點幾先到，不過最後要十點半先出發。無人行過呢條路，一路上都係跟隨網上的資料。今日的天氣非常好，無上星期咁大煙霞，陽光充足，萬里無雲，另一邊諗就係一路行一路曝曬中。由荃威花園出發，一路上都係舖好的石級同斜路，非常方便行唔慣山的人。行左無幾耐，望轉頭，已經可以見到荃灣景致。

差唔多十二點先去到古道的入口，過左入口無耐，可以見到青馬同汀九。如果無煙霞的話應該都幾靚。

之後都係一片無樹蔭的山邊行，直到見到企業植林計劃的植樹地之後，先入左樹林，入左去涼快得多。

沿途可以見到好多呢D咁的植物，下面呢張都幾鍾意。雖然入左樹林，但係有一段路地下都好多沙，加上落斜，間唔中行行下就有人跌底，睇黎都要買對好D的鞋行山。

過左多沙的地方，就入番石屎路。路的頂部都被樹包住，行的時候非常涼快。

過左呢到就轉左上露營地點，然後就到左間喜香農莊。大家係果到抖左一陣，跟住行多陣就到深井喇。十點十起步，三點半左右到深井，三個半鐘的路程，行到大家都攰晒，加上無食晏，於是就係深井食燒鵝，食埋發記甜品，大家就散喇。而我就坐車入白泥同屋企人做冬。

加奇四季火鍋

2008-12-15T23:55:00.000+08:00

這是機場影相後的節目，本來要為從老遠歸來的阿聰食飯，但係最後佢病左，結果只淨下七個人打邊爐，不過也好，今次也打得幾豪，叫得太多，最後食唔晒。

成枱都係堆得高高的肉、丸、餃。唯恐七人之力不夠，最後都淨底好多丸…不過D肉真係幾好味，仲有個蝦丸，食落去好爽口，好似食緊蝦咁，象拔蚌也很新鮮。雖然下晝食飯成日經過呢個地方，但係都無試過黎打邊爐。

食飽影一張，呢張係Ryan影的。

這是煙霞滿布的日子

2008-12-15T23:45:00.001+08:00

今日仍然好晏先起身，屋企煮了飯，唔駛出去食。本來一心想去機場果邊影相，走出露台，當連青山都望唔到，就有少少打消去影相的念頭，不過最後還是去了。真的很遠，其實只因我搭西鐵轉東涌線入去，當然也有更直接的方法，但是時間不是節省太多。去到東涌，時間剛剛好，正好有班S52黎緊，如果唔係要等20分鐘。搭左大慨十分鐘到，就到左機場維修區，一處充滿火水或燃油加上廢氣氣味的地方，當然氣咪其實不是太濃，就好似行過車房咁。機場維修區其實位於機場跑道尾，係果到可以好近見到飛機升降，亦係睇日落的其中一處好地方，只係太遠，又唔俾泊車，無乜人黎。呢個天氣我黎，當然唔係影日落。

要黎到呢邊其實行一段路，搭巴士去果陣會經過呢到，落車之後就要走回頭。呢條係導航指示燈，一路上行過黎都只有車，一D釣魚或者影相的人，仲有飛機起飛的聲音，好似好荒無咁。

唔知係咪多左條跑道用，呢邊呢條跑道都一直只有飛機起飛，等左好耐走緊果陣先見到一架機降落，五分鐘左右又黎多一班。當我行到番埋去都已經天黑黑咁。飛機太快，第一次影，未能準確捕捉。

之後的大慨十分鐘打後，第二班飛機又黎，今次試曝飛機的光軌，可惜時間掌握得不好，只影到一捷，其實呢張相是第二張拍下的，初初飛機進入鏡頭範圍按了一下快門，但係飛機好耐都未過到黎，只能拍下前面的一少捷，跟手再拍下這張，顯得不完全，不過有咁大範圍都還可以。本來都想等多班，但係約左人，要趕六點半的巴士離開，所以就咁就走左喇。相信夏天無咁大煙霞應該可以影好D。

放假一攝

2008-12-14T23:00:00.003+08:00

因為老闆夜晚Mon batch，最近Firefight mobile都無響…訓得安心左。放假踏入第三日，開始好晏起身，天氣無咁凍果陣都可以十點醒，而家唔得喇…訓到咁晏，醒左都食晏。今日下晝兩點先出去食飯，當然我起左身食左個包先，行過錦薈坊，見到有人表演緊，拎相機出黎影影，其實係兩個外國人表演，一個唱聖誕歌，一個跳舞，舞者望鏡頭下影一張…

之後去左大會堂出面，見到義工同樂日，有好多狗醫生係到俾人摸，呢隻實在太得意…又影一張。

本來有好多扮得好攪笑的小朋友，不過實在太多人，影唔到，加上我好似阻住左大會攝影師咁…之後就走左喇。

跟手就同Jason去左祖堯邨，諗住影三號幹線，都未試過去上，初初都係到搵路。本來想上啟敬樓，仲要Jason咁啱搵到佢個Friend住係果到，一心諗住佢帶我地上去，點知個看更企出黎話︰「你地一定係上黎影相的，唔上得」，經一場理論下，就算話上個Friend屋企都唔得，雖然佢又講唔出理由，不過免得麻煩底下，都係去番停車場果邊影。結果影到呢個View，相信係樓上影個View會大好多，哈哈。

六點半天就黑晒，跟手就歸家喇…

又大一歲啦

2008-12-12T22:18:00.003+08:00

遲來的Post，一直都好懶好懶好懶，所以都無係到寫野。又大一歲啦，多謝各方好友慶賀。多謝大家的Facebook Message同SMS。

辛苦晒大家，咁遠都入黎我到攪到會~攪到大家咁夜先返到屋企，當然住屯門果D除外。

呢張係Office的，好似無合照，所以放呢張算喇~應該係搬之前最後一個係11樓的Birthday Party…

生日果日放假，不過拎住Support Phone好似唔係咁好過，過左十二點，個Support Phone就響，生日的第一個清晨就接左兩個Call，好在都係輕輕攪惦。訓到十一點幾先醒，醒左就收到阿May電話，Thank you! 本來諗住早D出去行下山咁，結果出到去都三點，行行下仲要落雨，好彩只係落左陣，落山之後就同屋企人食飯，雖然佢地唔記得左…不過好在都齊人咁食左餐飯。之後訓果陣又收到Call…我係咪應該多謝公司呢~大一歲，希望來年順順利利就好喇~

香港鼎泰豐

2008-12-03T21:02:00.002+08:00

今日同外婆出左去食飯，講左好耐，一直放假都自己出左去，所以今日就陪阿媽帶外婆出左尖咀，去左鼎泰豐，一程車，上車落車就去到果到，外婆行動不便，不能去太遠，只係我今日無問老豆借架車用。去左新港中心果間，果陣點半，無乜人，門口的待應有三個，帶位的初初諗住帶好遠，回頭見到婆婆先揀張近枱。

係香港的鼎泰豐食，其實都無諗住會好好味，小籠包比起金滿庭的，好似金滿庭好味D咁。叫左個麵、飯、小食同碟菜，個飯幾好味，麵就差D，個辣味黃瓜超辣，可見紅紅的黃瓜，食左一粒要飲飲茶…

小籠包得六個，計落要8蚊粒，真貴，最後埋單貴過係台灣食，不過服務幾好，幫你「針」醋，但係個待應太高「針」落去，彈到成張紙都係，好在唔係彈落件衫到。食完之後就搭原車返去，係到站果陣，因為婆婆行得慢，我落左車門口我阿媽先扶到佢企得起身，我回身想入番去，個車長閂門，痴線架，夾住我隻手…要叫先開番，睇都唔睇，又唔睇下有人行緊去落車，唔係大嗌佢都唔開番道門，好在佢無開車…不過都係我行得太快…

War Game

2008-12-01T23:53:00.001+08:00

琴日去左打War Game，同唔識的人打，空著肚子，由七點打到十點左右。不過都係自己唔食野先，餓住去打，體力去得好快。第一次玩JA，還好，第一個Game係自己Team都係第二個死，之後的都係射死一個，俾另一個射死。近果陣成日都唔記得Bingo，有時仲會反應射左人一下，真係唔好意思。

打到最後的持久戰…明明射仲左人仲要俾佢射番我，真係燥左，不過可能佢肥，Feel唔到喇。但係佢反過黎射我，手有個位射仲左損左少少，其實太近喇，仲要開咁多槍。唔玩唔知，都有少少痛，不過只要人地唔開連射，都無乜問題GE。連續玩幾個Game真係幾攰，男仔渣果支槍又重，拎住佢舉起跑，去到尾果幾個Game都喘晒咁，睇黎太耐無打波喇…返工果陣仲要扯住扯住咁。

港大畢業照

2008-11-29T22:33:00.003+08:00

為慶Sharon同阿君畢業，加上佢遠道歸來，今日一行九個人上左港大影畢業相。約左朝早十點，但係十一點先開始影。基本上大家黎到果陣都係飲咖啡…聚聚舊先，慢慢先開始影。都唔知幾耐無去過Kong U，太遠喇，去果陣同返工起身的時間無異。開始影果陣陽光好猛，多人企埋一齊果陣其實都唔識點影，不過呢張應該係最好。

避免大家成日覺得我D相Under，都刻意影光番D，不過有好多相都Over左，放左上Facebook果D大部份都Tune過Explosure少少。因為唔駛特登影咩景，所以16-85都係拎過出黎一次，之後就全用支定焦鏡。當然無聊果陣都繼續試下鏡。

影下蓮花…

Kong U門口的花…

影到點幾就食飯，食埋飯返到屋企都四點半，走果陣仲要唔識係Kong U走，最後沿住西邊街行左落去。D相影左返黎有好多都要執，睇黎都要多D用M mode始終加一級級EV好似有時都唔係咁啱用咁。

第一支定焦入手

2008-11-28T23:20:00.002+08:00

今日放工之後就同2Ming去左買支定焦，Nikon AF 35mm F2，光圈大的定焦鏡，影人影物真係一流，當然之前買果支16-85都好好用，兩支帶出街，影景影人都好方便。

無閃光燈下咁影都幾好…

支鏡係DC Fever買，都係比起出面平左20蚊，支鏡好輕，雖然比50 1.8重，但係對比起用開的16-85黎講就輕好多。食埋飯之後就上左朗豪坊影下野。都係隨便影下，因為唔覺得D裝飾太靚，太金喇~係望上去天花有D睇頭。

周圍都放左一個個雪人咁樣的雕像。

下面呢張係同朗豪酒店接口果條橋果到影的…應該與聖誕無關的。

影出黎的相都好Sharp，後面的散景都好靚，應該有好一段日子唔買鏡住。

第二次到台北

2008-11-25T19:40:00.002+08:00

第一次同朋友搭飛機去旅行就係去台北，應該都係兩年前啦，今次同阿媽去，其實應承左好耐，不過細佬考唔到大學，一直都無準備，見呢排多假，於是就去一次喇。揀去台北完全係因為平，二十號搭下晝機出發，下晝三點就去到機場。不過四點幾先到酒店，因為飛狗巴士唔係酒店停，要轉巴士。一落機天氣好凍，根本就唔夠衫…應該得十一二度，企係街俾風吹都打冷震，於是去室內的地方，上左101睇台灣夜景，上次黎果陣都無上過。不過很貴，未上之前影一張先…

上去之後的夜景，呢張係室外影的，出室外係一個挑戰，很凍很凍很凍，所以影左一張就算了。

第二日天氣暖左好多，朝早九點幾就出左去，天空放晴，藍天白雲一直都係頭頂，去左「自由廣場」行下，跟住去左食小籠包，買了點東西，四點左右就去淡水，去到淡水五點幾，天空都黑晒…冬天的夜晚還來得很早。係漁人碼頭留左一陣就走，因為夜晚凍左好多，而且碼頭好大風。

第三日坐巴士直接由台北上九份，之前多得另一間房的香港人提醒，火車無位，當然我有去Check過，所以先坐巴士，坐個半鐘就到，原來佢沿路會經十分…係九份睇下風景，食左個晏就諗住搭車去瑞芳趕火車，可惜俾本地旅行團阻住上唔到第一班公車，攪到Miss左。於是搭左班特快去左另一個站搭下班平溪線火車，唔駛等兩個幾鐘。十二點半係九份走，三點三先去到十分。

多人過兩年前黎果陣好多，難怪火車滿座。隨處都可以見到有人放天燈。

係十分識左個台灣人，雖然坐火車走果陣佢帶我搭錯方向，不過佢非常好客，而且講左好多台灣野俾我知。返到台北七點，係酒店放底D野就係酒店附近食飯喇。

最後一日其實無乜地方去，只係去左地下商店街行下，買下手信，三點就坐車去機場，搭六點機返香港，一返香港就覺得好熱…

逛逛香港公園

2008-11-19T23:57:00.002+08:00

係去旅行之前出番個post先，今日開始放假，係呢段時間放假都幾驚，不過放假去玩就唔諗咁多。今日下書出左去香港公園，諗住睇下有咩影，其實成日經過，不過就無停係到影相。未入過果個觀鳥園，今次都入左去影，同雀仔置身係同一個籠入面，其實都幾危險，向天望耐D都唔敢…未入去之前係出面周圍影下，見到呢隻雀仔，其實等左好耐好耐…佢地先飛埋黎食野，初初一行過去就飛走晒。唔好睇佢好似好黃咁，只係佢向住太陽。

之後行左陣見到隻咁樣樣的，唔知係蝴蝶定飛蛾，佢飛飛下飛左落地，本來諗住影佢吸花蜜…

跟住就入左觀鳥園，雖然無長鏡係身，但係D雀仔好近，如果唔係隻隻大特寫，咁樣影都唔錯既。

下面呢隻其實好大隻，應該有孔雀咁大，佢本來係橋下面，突然間飛左去我面前，唔知係咪佢知道D人五點就要走，所以飛上黎霸地方，影完佢之後，就閂門，俾人趕走喇…

影完之後去左尖咀食飯，2/3支莊莊聚咁…傾下呢樣果樣，係食得飽左D。

涼快的一週

2008-11-15T16:24:00.007+08:00

好幾日無寫Blog，都係因為懶左唔寫咁多，而且呢幾日都係返工放工返工放工咁，無乜點出去。上星期五去左配眼鏡，有人幫手揀實在太好，個Sales好似唔理人臉形咁，拎左好多副都怪怪地，最後揀左副有番下面個框，不過多左個框，戴左睇落唔係好慣。配眼鏡果陣撞到個舊同學，香港真係細，去無咁旺的地方都會撞到，可惜入間鋪果陣見佢唔到，幫唔到佢收佣。

之後星期六On Call Support，好在果日無乜野做，都係係屋企抖抖，成日出去，加上天氣涼左，都想係屋企Hea Hea。個電話都響左一次，Support 左唔係太耐，都係開Batch見到野死左Rebuild番Index，本來話要Support第二場，好在之後佢又話唔駛，然後又多了一日。

經濟變差，周圍都講緊栽員，星期一先見到有新聞話公司會栽六百人，真係人心惶惶呢，相信個新聞都係真ge，只係唔會一次過咁栽，食親飯都係講呢D，慢慢好似變左用黎講笑咁，不過生活仍然都係咁。

星期三Comp Leave番早一個月的Support，朝早出左金鐘，然後終於再上左南華會打左陣保齡，上到去個阿姐懷疑張證唔係我@@，匈匈佢之後佢就無再問，打第一球差D跌低，個地下滑到呢…都係匈阿姐的報應，打左兩局就走左喇。返番屯門之後再入左白泥影相，都係帶2Ming佢地入去。閒日入去無乜人，搭車入去，搭車出黎都唔駛等，不過就攪到本身住係入面的人上唔到車…

入到去得五六個人，潮漲得好快，睇天文台網頁雖然寫著話七點漲，但係入到去果陣已經漲緊，無夏天果陣咁好，果陣仲可以行去果D細的紅樹堆到，不過星期三天空一舊雲都無，可以影到咁樣樣。

因為大家都覺得我影的相偏暗，所以次次影番光少少…

呢張其實有少少Magic，不過太陽太光都唔係好見到。

冬天的Magic都係差少少咁。呢排開始覺得自己影的相好似好硬咁，要慢慢試下第二D角度影，應該可以好D，果然要練習…

星期四就拎左副眼鏡，不用一個星期就到貨，真係快到呢…拎果陣乜都無較過就可以走得。應該有四年無換過眼鏡，一戴起，暈到差D差錯腳，睇黎要戴多幾日先會好番D。

好長咁寫完呢一個星期的事，下星期放假，會再去多次台北，睇果邊天氣預測仲係落緊雨，希望去到果邊個天氣會好D喇~

練習練習

2008-11-03T19:51:00.003+08:00

今日Comp Leave 一心諗住出去影相，點知十點起身果陣天黑黑，仲落緊雨，於是訓多陣…到差唔多十一點先醒，望出去個天已經停左雨，於是就睇下天文台網頁，見到尖咀都停左雨，所以食左晏之後，就搭車出去，經西鐵出去來回都唔駛錢。

三點幾去到訊號山花園，唔知佢係咩黎？可以睇下呢到。其實都係見到地鐵本Metro POP，先上黎睇睇…遇左無咩好影，都係試機之作。一上到去，就發現唔記得Check佢開放時間，上去先見到個牌寫住上午九至十一，下午四至六，唔知中間果段時間十一至四呢五個鐘點解唔開放，於是落左山，食D野再上，未夠四點阿姐就開門。

入到去呢，其實咩都無，條梯好窄，基本上企直的話係會撞到個頭，四邊都可以望出去，見到維港，見到中銀架，不過好大舊烏雲，都係影左一張…

條樓梯一路都係旋上去，去到最高的第二層，再上的一層鎖住左，條梯都好窄，所以無嘗試上去。

其實係食完野返黎之後，個公園就出現左好多貓仔，隻隻都坐係地下訓覺，呢隻係其中一隻，我行過佢都唔係好理我。

因為落完雨好多蚊…影到差唔多四點半就走喇。

四個月後再上鳳凰

2008-11-01T21:50:00.004+08:00

自六月上過鳳凰山之後，都已經有四個月的時間，今次本來約左好多人，最後淨番五條佬上山去。哈佬喂的夜晚，萬里無雲…放工果陣見到夕陽的天空都好靚。十一點三同2Ming搭車入東涌，十二點入到去，先買野食整備一番，之後點三搭最後一班車去伯公坳。一落車見到成班人係山腳，初初仲以為係黎露營，結果後尾先知佢地全部都係黎行山@@。

初初天空好靚，仲以為十一月第一日的日出會好靚架。

呢到係山腳影既，影影下，本來以為會露營的一大班人，就開始上山。為左追趕，於是收起腳架，加快步速，向山上進發，當過左佢地果陣，因為我行得太快，攪到大家要抖一陣，係星空下抖左三四個字，之後就俾佢地過左。不過當我地慢慢行到一半果陣又過番佢地。

越行越高越大風，霧亦都開始大，其實係走進了雲的中間，能見到亦越黎越低，當Donald係前面行快幾步，我已經見唔到佢，當我行快幾步，又唔見左2Ming，大家都以ACK黎溝通，不過有幾次真係好鬼遠，要嗌好大聲先聽到。不過好在未去到申手不見五指的階段，當前後無人，只能聽到風聲的感覺，真係好似打緊恐怖Game咁。間唔中行行會見到高處閃左一下…初初以為係閃光燈，不過過左最後一班人仍能見到，果陣都估可能係閃電…都幾驚架，好在都無事發生。最後我地係四點九左右上到去。

太大霧喇，無乜好做，煮個麵充饑。之後係寒風下一直坐到六點半的日出時間，但係霧都係唔散。

所以就早D落山，不過前路都係見唔到底的山路，好在行左唔係好耐，八點幾就行到落昂平。

跟手就搭的士返東涌，係東涌食左個大家樂早餐。

結果都係睇唔到日出，不過咁樣行一次都幾爽，上次第一次上去就見到都幾好彩，雖然大家都話唔係最靚的日出。

Walk For Nature@ Mei Po

2008-10-26T22:00:00.004+08:00

今日又出去喇~十一點半就去到上水，準備搭車入米埔參加Walk For Nature。一行五人搭左一架可以坐到六十人的大巴…成車得我地五個人。十二點半入到去米埔，先拎左水同毛巾，再影埋相咁就出發。從來未入過米埔，細個的時候就聽得多，一直都幾想入去，今次有機會，就參加左，多謝Kimmy發起呢次活動。起步果陣總覺得我地係最遲出發，亦擔心會唔會唔夠時間行，不過問左之後就知無限時，於時都慢慢咁行…係入口果邊周圍都見到呢D斬左的樹，或者樹都有病，見到切口入面都係空心。

一路上風景都好好，天氣亦都唔錯，係有少少煙霞，係米埔入面行，周圍都係一D河同埋魚塘。

沿路都有好多牌話俾你知，呢D係乜野，仲有Check Point介紹今次活動的目的，講左好多關於保育的野，原來食的海鮮都會唔環保架…

一路上有好幾間觀鳥屋，睇到的雀仔，當然比濕地公園多好多，而且義工會Zoom去一D比較少見的雀仔講解，沒有長鏡，所以唔影雀仔，去到果個位即使有支300隻雀都唔會好大。有時行過間唔中都會見到蝴蝶飛過，咁啱有隻停左係塊葉到…

行左大約兩個鐘，我地經過左一個好多蓮花的湖，我地邊行邊影，又睇埋雀仔，經常俾人超前。

Check point的攤位，我地好認真咁玩架，我係無幫條魚改名。十二點幾開始行，行到差唔多四點半，我地先行到最後一個Check Point，都幾攰，大家都無食野行左咁耐，仲要之前果日踩單車，不過感覺非常好，可以見到好多雀仔，同埋周圍都好靚。如果天氣更好，應該會仲靚。放晒D相入去呢到有興趣可以入去睇睇…

烏溪沙一日遊

2008-10-25T23:45:00.000+08:00

為慶貓貓生日，星期六大家舉腳去左馬鞍山租單車。因為星期五打左兩個鐘網球，隻腳攰攰地，所以比起平時踩得慢好多。第一次去馬鞍山租車，非常便宜，十五蚊可以租到八點，租左車就由大水坑出發，經安泰沿海旁踩入烏溪沙，不過唔識路，踩到去西貢邊邊就開始唔對路，因為已經過左馬鐵烏溪沙總站。拆返之後先見到烏溪沙村，好在有個伯伯帶路，先去到海灘。

印像中只有細過小學旅行時去過，不過去到其實都幾靚…如果無雲，仲應該會影到日落，不過今日好多雲，都好，踩落無咁曬。停左單車去沙灘邊，大家就不顧而去。行左去用木搭的碼頭。果到可以租船出去，係出面都見到幾隻船。

行上碼頭，可以見到一位婆婆養的狗，好多人同佢影相，不過佢次次比我的表情都係咁…

再行出D就有人係到釣魚…

之後行番過去沙灘果邊，回望一下就見到蘇光…

踩到差唔多六點就回程喇，沿路上見到一隻好痴人的貓，玩左陣之後就再繼續踩番去。玩完之後大家就去左馬鞍山一間叫Daddy's Kitchen食飯，然後就歸家Loo。

試相機之日

2008-10-22T21:32:00.001+08:00

今日放假，去左市中心攪攪機票的野，之後就出去試相機。其實無咩地方好去，因為天氣唔係咁好，雖然好好太陽，但係好多煙霞，影咩天都好似灰灰地咁。先搭西鐵去左荃灣西，睇下海邊會唔會有咩野可以影，不過一行出去好似好荒蕪咁…結果入番西鐵站搭去尖咀。

一去就上左海運停車場，閒日果然非常好，無人，車又唔多，影下人地架車先…

原來啤酒節係停車場上面，不過咁早未開始，無野好影。

之後太陽都差唔多落山，又影下先…

咁啱有人行緊去啤酒節場地返工，又影下先…

再影下維港對岸…天色真係麻麻。

之後旅行社打黎，就返番屯門攪埋D野。

潭魚頭打邊爐

2008-10-21T23:12:00.002+08:00

今日放左工就去打邊爐，買左D90後的第一次活動，當然拎部機出去喇…部機係室內的時候影出黎的野都偏黃，不過D60都係咁，而家室內影相，都開始唔用Auto WB。今次去潭魚頭打邊爐，同Fish and Peter慶祝生日，不過都係大家咁耐無見，出黎食下飯聚舊，估唔到係潭魚頭食其實唔係咁貴，仲要我地係叫左半隻龍蝦…或者之後我地都唔係叫得太多野。

叫左一邊係蕃茄魚湯底，另一邊係純魚湯底，當蕃茄湯底滾的時候，大家就扔左隻龍蝦入去，都未試過打邊爐有龍蝦，之後未落其他野，連湯都可以飲…

食落，雖然無小肥羊咁好味，不過都幾多野食，而且都幾新鮮，食到差唔多十點就走，好在第二日請左假。

D90入手

2008-10-20T22:56:00.000+08:00

終於都買左D90喇，當全港的大行都無Body賣的時候，就去試下D細舖，上Nikon網站Check左特約零售商，加上Forum網友的消息，於是係星期一Lunch果陣搭車過左尖咀買機，一來驚淨番果兩部會好快無左，二黎驚俾人厄…不過一入去果間舖基本上門面乜野都無，但係成間舖都係Nikon的金盒，急急咁試左一陣機，無乜問題，咁就食過M記搭番車返公司繼續做野喇。

於是，而家部單鏡，就變左咁的組合喇…

返到屋企試影左幾張，再試埋D係試機果陣無試的野，因為太多Function，所以都試左好耐。

個盒好大個，買果陣本來佢無袋…好在佢間舖有個後生的同事俾左個DKNY袋我，如果唔係…真係唔知點拎返公司。

閒閒一日

2008-10-19T22:21:00.003+08:00

今日再去濕地公園，秋天的天空雖然無雲，但係總有點煙霞，出發的時候先去拎九折的Coupon，個職員Check都唔Check就俾左我地喇…之後就坐輕鐵去左濕地公園。入去果陣無留意到出面有Counter，後尾先知原來有識的人係果邊幫公司做義工…

因為賣左部60仔，都係拎住部R8影下野，唔夠光，偏藍的情況仍舊，不過影荷花都OK的。

三點幾先入到去，行左唔係好耐，係睇雀仔玩望遠鏡玩得耐D，之後未到五點就走左，睇下搭唔搭到車入白泥，因為今日五點十一日落，如果係五點半入到去，應該會見到咸蛋黃一面。於是就博一博，係天水圍試下捷唔捷到小巴入，結果…第一架滿左，隔左一陣有架大D的黎左，而且仲有位~於是就一齊入左去。不過小巴去到中途就Jam左，因為D人拍左車係單程路的避車處…見差唔多到，於是就一齊行過去，一路行都仲見到金色的太陽，好靚~不過當行到落沙灘，佢就無左喇。日照時間短左，太陽都快D唔見左。係沙灘到留左一陣，就準備回程。

由於睇日落的人實在太多，於是好似之前咁行番去村果邊，不過今次無咁好彩，因為好多人已經先到一步。行到去下白泥村果陣，仲見到一大堆人係小巴站，等左大約半個鐘，就有小巴喇。之後就係元朗食埋飯…

石澳遊記

2008-10-12T23:40:00.002+08:00

今日同一班同事去左石澳行山，一行十四個同事，塞晒成條路。先去筲箕灣搭9號巴士去到懲教署，上條斜路再經過一個山頭，去到龍脊再轉落去搭車入石澳，行得很快，沿途的人亦很多，間唔中出現塞人的情況，都幾無癮…沿路都唔多上斜的位置，大部分時間都係行呢D路。

一路行，行到龍脊的最高位，可以遠眺石澳的景致，可惜煙霞太多，睇唔得清。上到去風一直都很大，還好行到熱熱地，企係到真係透心涼。

高的位置，只要無遮檔下都可以望到整個石澳。

當然風太大了，企得耐大家都吹到頭痛，開始再繼續行…

轉眼間就到左石澳喇，時間比預期早很多，於時我地去左沙灘睇睇，再行埋去南面果邊有人攀石的地方睇下…一路行就發覺人地D屋的門口都有好多人係到影Model，所以好多屋的外牆都都掛住左個牌「不準拍攝」。

去到果個好似島仔的地方，就係人地練攀石的場地，不過今日唔見有人爬，或者風太大吧，係島的高處可以回望石澳…

到差唔多六點，就去左乜記士多BBQ，食物不太新鮮，而且原汁原味，不過行左咁耐都好肚餓，最後大家都食左唔少，然後就各自歸家，返到屋企都十一點囉…

再見喇 60仔

2008-10-11T21:25:00.002+08:00

今日終於都放左部D60出去，原因唔係因為佢唔好用或者壞左，而係真係想試下玩多D定焦，但係AF-S的定焦實在貴得很，所以最後都係決定放出去，轉去D90。本來無左呢個諗頭好耐，不過見到2Ming咁做左，最後都忍唔住放左，計埋舊買左無耐的原廠電，洩左大約$1,500，買家是新手，賣的時候我都有講過CCD有機會有塵的問題，至於佢想用番Nikon的舊鏡，我也唔太清楚，不知佢舊鏡的Mount係咩Mount。

賣左之後就要等D90，未有貨，都仲等緊。

同日，阿爸又拎左隻狗返黎，今次係狼狗女，一入黎就係咁甩毛，不過好乖，雖然好大隻但係成日好似好驚咁，當然新地方會有D驚ge，今次帶返黎都係純綷阿媽想睇下，不過佢係咁流口水，又甩毛，當然最後亦都會送番去木屋仔到，而家果到已經有四隻狗，一隻貓，希望唔會變成流浪狗之家喇，呢隻狠狗都係人地俾…

南丫遊

2008-10-07T21:09:00.000+08:00

好耐無去過南丫島喇，上次同同事去都已經係Intern的時候，那時候Boss行得好快，好似趕路咁，今次同大家去，非常好，天氣很清爽，唯獨太陽被厚雲遮蓋，整日個天都灰灰地。係去南丫島之前都要返番公司一陣，請示之後，一點左右先離開。

兩點去到碼頭，第一個係Kimmy黎，其他果D大家都遲左一兩個字。船程很快，不消半小時已經到南丫島。重陽紅假，去南丫島的人多的是，一路行條路的人數都好似無少過咁。去到邊，賣小食的舖頭都排滿晒人，更甚的係賣豆腐花的舖頭。一買就八碗，面果層食到有燶味，豆漿煲燶左…之後果D都無喇，行到熱熱地食碗凍豆腐花，係幾好既~

係大家努力排緊隊的時候，我就影下側邊的野菊，咁啱有隻唔知係蝴碟定飛蛾吸緊花蜜，就Zoom到60MM近近咁影左張，都幾Sharp，係顏色怪怪，可能因為天陰吧。

食左豆腐花之後就行左上去風車果邊，天色好陰，加上無+EV，變左咁樣…不過正值黃昏，可以見到有少少紫紅色係天到。

然後就行呀行，一路上都有好多雀係天空盤旋，影一影，雀仔多時，黑角都多。

最後大家六點幾去到索罟灣，食左天虹，好正的海鮮，平平地，又好味。八點幾搭番船出番尖咀，跟手十一點先返到屋企，第二日又要返工！

Saturday... Sunday...

2008-10-05T21:22:00.004+08:00

放假放得耐好似有報應咁，一返黎返番工就返到星期日，希望星期二唔駛返啦，亦唔好落雨啦…連續咁返工真係幾攰，加上都係自己夜訓，返工都無乜心機做咁，做得好慢好慢好慢。今日落勁大雨，出門口果陣已經沖濕左對鞋，迫不得以下拍左小巴去西鐵站，原來真係快好多！當然好天就會行番出去喇。早左去到西鐵站早左去到奧運，所以就去左百佳買茶葉先返上去。

呢排係奧海城放左幾部掃把佬係到，原來Subaru Palm Challenge係奧海城攪，前果兩屆都有聽過，不過地點好似係黃金海岸，今次竟然係商場，實在太優待參賽者喇…因為呢個比賽係鬥耐力，將右手拍係架車到。最後的優勝者，會有部Impreza！睇初初果屆好似無咁多規則，或者係我之前無留意啦…睇番個網頁，原來上網就可以Apply... 如果仲係學生，一定會參加囉，比賽場地係咁既…

Lunch 果陣參賽者黎晒，果陣先知原來會係一大棚人咁痴住架車，如果唔駛返工係果邊睇，應該會幾攪笑。

假期的最後一天

2008-09-29T23:05:00.003+08:00

今日放埋最後一日假，第二日就要返工喇，真係唔捨得，好難得可以攤抖咁耐。今日出左去旺角打Snooker，係出去之前去左大埔火車博物館影下相，反正想出去行下，而且隻Game話咁快就打完左。

其實沒甚麼好影，不過是練習一下，不過都沒拍出好的照片來…

本來想影人地的細路仔，有個真係勁得意，係路軌上面跑，不過不太好，最後都無影…

四點先去到，無去咁耐，原來係收五點的，之後就走左，行多陣就搭車落旺角喇。又去皇雀會喇，成班唔係好識打Snooker的又聚首一堂，最後都沒有清到張枱上面的波…哈哈！

其實影完呢張，果球係唔入袋架…

Diaster Day of Crisis

2008-09-25T18:29:00.003+08:00

隻Game 終於出左，一隻集駕駛、射擊、救人加跑步的Game，非常好的壓迫感，只係救人的時候有D麻煩，好多要要記住，不過渣車果陣真係好真實，好過幾隻玩過的Wii賽車Game，放假無野做玩下的確唔錯…詳情可以看看官網。

http://www.nintendo.co.jp/wii/rdzj/index.html

放假

2008-09-25T16:36:00.005+08:00

去完宿霧之後仲有幾日先返工，不過經常落雨，仲要打風，不得不留係屋企。基本上係屋企都係執下相，執下好耐好耐之前搬左屋仲係箱入面的野，仲有更耐之前搬入屯門無拆出黎的野。因為天氣唔好，出去影相的心情也無囉，出去都只不過係去銀行攪埋D野，或者買下野咁。本來諗住北上玩下，可惜友人不息，都無去到囉…不過好耐都未試過咁長時間的Hea，當然，如果繼續係宿霧Hea就更好喇~

等緊十月三號播的TOA…漫畫化後動畫化，Tales 10周年紀念作RPG 的動畫化，故事幾好而且很場，不道是打左六十個鐘的RPG。

段YouTube要去到四分五十先會見到…

海洋公園之夜

2008-09-20T23:12:00.002+08:00

去完宿霧休息左一日，就再去海洋公園，員工只需四十蚊入場，仲有每人三張的20蚊野食優惠卷，朝早去到良景問阿君拎D飛，三點幾就出發，搭左個幾鐘車先去到海洋公園，好似好正咁，去到金鐘果陣巴士站牌寫住包場…

其實今都係純粹陪父母去玩，佢地都有十年無去過，加上而家屋企先安定D，同佢地過去行下，都係睇下中華鱘、水母同埋熊貓。好在早左去，真係超多人，六點幾就用左D現金卷黎食野，卷後面寫一個人用一張，但係埋去果陣以幾張一齊用，買野食都係用左幾蚊。之後就坐左上去…

原來係上面影落黎都幾靚…

再影影海豹館的「燈塔」，天色的配搭真係好~

落左摩天輪先去中華鱘館，唔夠光下追住條魚影，呢張最清。

之後再落左熊貓館，不過果陣都八點幾，D熊貓訓晒，最後都係早D返屋企…

宿霧之旅第六日

2008-09-18T12:00:00.003+08:00

寫意的宿霧之旅終於去到最後一日，最後一日其實無乜野做，行程入面要行五個鐘SM商場，好在商場入面有戲院，保齡球場，基本上唔駛真係行商場。商場的保安都幾嚴，要經過金屬深測器先入到。我地入左去無耐，就過左去保齡球場，用左港紙大約二十蚊左右的價錢，四個人玩左兩個鐘。不過條球道有D問題咁，成日放個樽落黎果陣都會有一兩支跌左，唔駛打就有一兩分落袋。

打完之後就去左Jolibee食Lunch，係香港都未食過，不過好似得一間，呢到就周圍都係。

五點半再係間食左咁多日最掂的中國餐館食飯，可惜都係食果陣先知係最好味，因為食左Jolibee都唔係好食得落。之後八點幾就上機，又再搭番呢架水都要俾錢的飛機返香港，真係唔捨得…好在仲有幾日假回回氣…

今次去旅行真係好舒服，景又靚，行程唔趕，仲有得游水同潛水，仲有好多玩得的團友，最攪笑係我地呢個六日團係首團出發，第一次成團。

宿霧之旅相簿

宿霧之旅第五日

2008-09-17T08:00:00.003+08:00

今日四點半醒左，諗住睇日出，其實係第一日五點半果陣曾經係酒店見過好大個太場，不過影唔到。雖然大家好辛苦咁陪我發癲係五點出左去，不過天公不造美，落微雨，乜都睇唔到。企企下天都光埋，結果就行返去再訓過…

八點幾醒番之後就食早餐，跟手就學潛水，學完之後我就同其他人一行六人出左海潛水，付出人生的第一次，而胡子、Vinna同貓貓就去左坐玻璃船。著住潛水衣的我…

第一次潛水，吸純氧的感覺令人上癮，係講笑既。係海入面的世界先最吸引，可以摸到珊瑚，可以摸到橙色的小丑魚，周圍的珊瑚雖比不上澳洲(從Discovery Channel比較)但係都好靚，感覺真舒服。潛果陣會有個人跟住，跟住我果個連潛水衣都唔駛著，但其他人個個都著，佢邊帶住你，邊同你講邊D唔掂得，最衰佢唔教點睇氧氣錶，半個鐘轉眼就過去，好在有團友幫手計時，差唔多五百蚊港紙，就用左去潛水，不過真係好好玩，唔怪得D人會上癮。

上番岸之後就繼續同胡子佢地玩水，玩多陣就執野坐船返番宿霧市…

宿霧之旅第四日

2008-09-16T08:00:00.002+08:00

第四日係環島遊，朝早坐船去保和島出面的海域浮潛，風高浪急…我地坐大船去到海中心，再轉坐細船出去，著晒救生衣，今次無得唔著咁游，因為浪會衝走人咁，今日貓貓終於都落水喇…大家都係船上，只好買下呢張有紀念價值的相。

今次浮潛果個位比上次係忘憂島浮潛果個位仲多魚，D魚仲要咬人添，不過可以見到一大群魚圍圈咁游，真係靚到呢…有團友話見到海龜，可惜我地見唔到…不過已經好靚，好似置身於Finding the Nemo的世界咁，係差在無橙色的小丑魚。

浮潛完之後就返番渡假村，食左個Lunch之後基本上都係自由活動，我地就係沙灘玩…係海邊游水，個海游極都好淺水，所以可以好安心咁玩，呢到就係渡假村沙灘…

一到黃昏仲可以見到咁的景色…

睇埋月出，真係好寫意…

宿霧之旅第三日

2008-09-15T08:00:00.001+08:00

今日朝早六點半起身，搭船去保和島。船程個幾鐘，一路上都係到睇戲，間唔中上下夾板影相。係隻船上面仲有D黎渡假的外國人，外國人的細路真幾得意…

到保和島果陣都差唔多食飯的時候，我地係一艘「船」上面食Lunch Buffet。食食下就到左當地土人的部落，雖然佢地講野我地聽唔明，我地講野佢地又聽唔明，不過入去影相果陣佢都會指住個Tips Box，俾左少少佢地就係咁影，因為身上無散紙… 第一次見土人，好黑，見到我地又有D緊張咁…

我地可以拎佢地支矛黎玩，玩埋佢把弓，玩佢地玩的野，係差在我地唔會俾我地玩的野佢地玩。離開左土人的村落之後，我地就坐車去朱古力山。一路上都係大片青翠的田野。

差唔多四十五分鐘的車程，先去到朱古力山，一個個山丘，好似畫公仔咁。

睇完朱古力山，就去睇眼鏡猴，全世界最細的馬騮，放係手果陣，真係成隻公仔咁，呢D唔係野生，無攻擊性，不過Vinna 唔敢掂…

睇完眼鏡猴就去渡假村Settle Down，非常棒的渡假村，除左間房之外。可以就咁行去沙灘，除手都執到白海星，周圍都係泳池。

宿霧之旅第二日

2008-09-14T08:00:00.004+08:00

第二日的行程係去忘憂島浮潛，唔記得要幾點起身，應該係朝早的六點半，食左酒店的早餐之後就出發去大富利渡假村，係果到換好晒衫，就係海邊上船，出發去忘憂島，就係坐呢D船喇…

係坐緊果陣好多船夫就埋黎幫你按摩，200p一次，一次就攪到成頭都係油。係未去到忘憂島之前，大家先去玩浮潛，好多魚仔係海到，用手拎住D麵包就可以餵佢地，不過無潛水箱，影唔到D魚仔。下面呢張係搭緊船果陣影的…

入到島，可以食到只售300p，有手臂咁大隻的賴尿蝦，四個人燒左一隻黎食，好正…食完之後就入左村，睇下當地人的生活，係村口有好多細路仔係到玩，用架手推車黎當搖搖板玩都可以玩到好開心~

無耐之後就離開忘憂島，再游游水，食即捉即開的海膽，睇埋海星，之後就返酒店，完左第二日。講到好似好快過咁，其實游水同浮潛的時間係好充足，好耐都未試過係海都游，今次仲要可以就咁潛落去見到魚仔，真係好正。

宿霧之旅第一日

2008-09-13T00:15:00.004+08:00

話說送完機之後，同日的夜晚十點左右，我又再回到機場，準備去菲律賓的宿霧，撞正同一日，不過唔係同一個時間飛，好在仲可以返屋企睇下有咩執漏。滿期待的一個Trip，因為陽光與海灘，可以游水，又可以潛水。雖然有個風o岩o岩係菲律賓走左，可能會落雨，不過去到宿霧機場果陣一滴雨都無。抵達時間零晨三點半左右，搭埋車去到酒店四點幾，D行李上晒房，就去左賭場企企，然後就等五點半早餐，食飽就訓到十二點，開始觀光…

第一站定光寶殿，估唔到係菲律賓有咁多中國人的野，行左幾十級樓梯上去，可以見到少少宿霧市的市景，不過無放係到…

之後就去左聖保祿古堡，睇門口好似去左歐洲咁…

最後就去左聖嬰大教堂，同麥哲倫十字架。

係食晚餐之前仲去左「新」生果街買左兩個芒果，去埋超市買左好多Chips 同芒果汁返酒店，Day 1咁就完左，不過未食個芒果。

送行

2008-09-12T14:30:00.000+08:00

今朝早五點幾就要起身，六點左右渣車入機場，差唔多七點入到機場，細佬搭十一點機，不過要八點幾Check in，七點幾未食野，結果係機場飲左個早茶。叫左幾碟野就兩百幾，真係貴。Check in 完無乜野做，影左D相就送佢入閘，希望返黎香港果陣會生性D喇。一過去讀，就要幾年，呢個星期屋企人都怱怱咁出街食左幾次飯，又不停咁影相，相信呢張應該係影得最好架喇。

送完機之後無乜野做，就過左一過大佛果邊行下，話說阿爸阿媽都無搭過360，又唔會無端端去果邊，跟住就坐左360 上去，一路上除左遊客，一個人都無，都係睇左一陣就返歸，係纜車上面遇到三個外國人，兩個巴拿馬人，一個希臘人，佢地係到傾傾傾，好似我唔識聽英文咁，不過佢地的話題真係好悶，無端端係到講希臘歷史，講講下佢地諗緊無纜車點上去大佛，同一個問題講左兩次，結果我就話佢地知其實可以搭車，再講下有咩地方可以去…希望佢地唔會覺得我咁遲先話佢知，又搭佢爹好無禮貌咁喇。最後返到東涌，係東薈城食埋Lunch，就渣車返去。

星期日隋影

2008-09-08T23:16:00.000+08:00

星期日正值風和日麗的日子，雖然間中偶有雷聲，不過天色很藍，又有一舊舊的白雲，於是去左馬灣影相…其實地方好細，又多龍友，阻住晒條路，難怪最近馬灣貼出告示，影相收錢…

一入門口就會見到個貝殼，沿途有好多油左顏色的石頭，慢慢行上去就會見到隻「雀仔」…

雖然無定焦鏡，用支16 - 85 影花都幾Sharp…

去完馬灣之後，因為仲有成兩個鐘先至食飯，於是就去左一號銀海附近影日落，非常好的方向，可以睇到個咸蛋黃，可惜影得唔好，不過都係匆匆忙忙咁影，有機會下次再試！

很喜歡下面呢張，啱啱有隻船經過，剪影佢的感覺幾好，不過水平差D D。

影到成身海水味同汗味之後，就過左小肥羊Farewell 阿聰，咁快就走，希望佢成功啦…
不過呢張相，好似變左Ryan做主角咁。

總結九月的第一個星期

2008-09-06T20:08:00.002+08:00

因為自己的疏忽，跟緊的果個project無留意到有問題的地方，本來做完的code係交左俾人之後，又要再加番d logic入去。用左好多時間去Check甩漏的地方，而且都仲未Check晒，再加上有其他野做緊，又就快放假，真係覺得時間唔夠用。對住佢地果Team 真係人都癲，D野改左又唔講，個Batch幾時行到差唔多開波先講，佢趕時我又趕，成日都話Don't Worry…離放假前仲有四日，另外果邊又有一份Request黎喇，希望放假前會清晒，唔駛俾個爛灘子人接手啦！

雖然好似好忙咁，星期二都七點零就走左去左打保齡，未試過去E-Max 果邊打，應該係全港第二新的場，等左半個鐘先有Lane，去左貴賓房打，果到有得唱K同Bowling，有兩條Lane，但係好窄。第一局成績如下…

打左局半就可以轉番出去，大好多，又涼好多，只係地下好「冼」，好多球都失晒準囉~ 不過個計分器可以計埋球速，用11磅最快可以打到29.xx km/h。

星期三去左尖咀食野，同Helen、William慶祝，係東鐵站，喜來登後面果間德國野，唔記得叫咩名啦…有即場表演切豬手，仲有好多德國腸同德國麵包，不過呢間野的麵包好似好味過係德國食過果D，或者應該係啱口味D…

如是者星期四都係咁做，去到星期五聽左個Java One的Talk，真係做左野一年就好多野都跌左…俾講者問…有咩Rich Internet Application果陣，唔識答囉，讀過Internet programming、Web2.0到頭來俾人問到果陣咩都答唔出，仲要難得坐前排的太陽人提水我聽唔到…不過不竟都只係囖左一陣，然後就繼續講JavaFX，感覺好似用Java Script control div object 咁，不過可以用Java 的Library，而且仲有好多好方便的功能，不過始終要寫好多Code。之後就講Java One入面的Topic，感覺世界變得好快，Java SDK 7多左的野，令Programming更加方便，不過我應該都唔會用到咁…

Ricoh R8 入手

2008-08-31T23:18:00.002+08:00

這兩天天氣大好，不過都無出去影相，因為好熱…雖然有諗過去青馬果邊影，但係睇左人地影的相，都係覺得搵日去馬灣影會仲正，所以都無去到。或者放Core果陣就過去影影。最近，俾左部Ricoh R6我細佬，變左無snap機用，得番部大機。眼見R10就出，但係同R8無乜分別，所以都心郁郁買，不過我老豆信用咭有折，琴日就買左喇…

室內影的相，同之前部R6一樣，不提也罷…因為部機白平衡係室內唔夠光果陣，都係好唔準，要Manual Set 先得，不過都係用佢黎影室外多，所以無所謂吧…

ISO 200 以上是沒有用的，不過要用到ISO 200 以上我都會用大機吧，最多咪開閃燈~雖然睇評論，大家都踩到佢一文不值，不過其實佢Focus好快！好準，但係大家都仲係話佢Focus好慢，不買咩機都係個人喜好，反正我唔係要求佢好似單鏡咁。

不過係拎番黎的第一部，俾我發現到Lens有塵囉，今朝拎左去換，睇左兩部新機先有一部係個Lens係乾淨，我知部機都係2000幾，不過個中原的Sales話，買萬幾蚊的鏡都有塵係入面架…我只好回應佢，咁果個人Check果陣一定唔買果支啦。之後換左部乜事都無，就再試下部機，係屋企試拍全黑的相果陣發現有好幾點係光，不過都係放到勁大先見到果D，再試下舊果部R6，都係一樣，不過10 megapixel，加上只售2000幾，我諗大部份傻瓜DC相機都係咁吧…

愚蠢

2008-08-24T01:18:00.001+08:00

今天做了一件很愚蠢的事。

排隊文化

2008-08-22T23:43:00.003+08:00

最近的新聞報道，都顯現香港人驚人的排隊耐力，不過排品很低。排炒票，排學位，排奧運表演賽門票，咩都通宵排。排炒票用報紙、水樽霸位，唔知係邊個諗出黎，之後大家有樣學樣。排學位八號波都唔走，講明順延，仲要掉轉頭Her人。排奧運表演賽門票，賣晒，就起閧、發洩…好似細路仔，扭玩具咁，好似想要，去排就一定有咁，無就唔啱咁，當然不可埋沒大家排左咁耐的功勞，不過也不致於發爛。就連今日掛九號，電腦展趕人走，大家都起閧、發爛一樣，雖然八號可以免費入場，但係亦至少睇下天文台網頁，睇新聞報道果陣，真係不禁講句痴線…

風季

2008-08-22T20:20:00.002+08:00

又打風喇！七點起身果陣都未掛八號，七點半左右就掛左喇，下晝仲要變埋九號，直都夜晚。雖然出面D風好似唔係好大，不過都出唔到去，係屋企繼續裝Windows，安左個64Bit Windows 之後先發現好多Windows 的白痴Hotfix 都無，攪到支高清手指安唔到，連MSN都要download個64bit version…但係安左又唔見得快左…整整下突然間有好大聲的碰撞聲！

隔黎屋天台個頂吹左去對面屋車房頂…成塊飛左過去，好恐怖，好在係飛係個頂上面，無繼續飛，無壓到人。之後幾家人就拿拿林搵繩綁住淨番果邊個屋頂，再用繩拉番成塊頂落黎，如果唔係佢又再飛，個風改變方向，就會吹去我地果邊…

攪左咁耐，都只怪無做好防風措施，住係呢邊有風黎真係要準備下，話說隔黎吹走之後都上左去睇睇，不過其實係佢個頂有好幾個位都唔係用螺絲鎖死，而係打大釘先會咁…

新電腦

2008-08-17T16:36:00.006+08:00

多謝Donald幫手，終於都買左部新機，以下係Config︰
MB︰Asus P5QL-E
CPU︰Intel Core 2 Duo 3.0 Ghz
RAM︰DDR2 800 4Gb
Display︰Radeon HD 3650
Harddisk用番舊果個，本來諗住安64bit XP SP2，但係隻碟有問題，安到一半死左，得番隻SP1 同Vista 係屋企，安SP1的話我Backup果D野會應唔到，因為SP1認唔到200GB以上的Harddisk…結果安住隻Vista用住先，啟動唔到，等緊隻XP… 不過部機真係快好多！加埋高清手指，終於睇到高清喇~不過我間房插牆果個天線只係收到J2同高清翡翠台，用佢俾果支天線下晝都仲收到亞視同Pearl，但係夜晚得番J2同高清翡翠台，咁唔穩定架…

Cap左個Screen，縮細左好有親身影的感覺XD

Bowling at night at Olympic City

2008-08-15T00:07:00.003+08:00

放工之後，本來同Albert、Kwan、May、Wayne去南華會打Bowling，不過因為多數的人都係OC返工，所以只好屈就一下，去番OC打…入到去個場俾人包起左咁，等左半個鐘左右先有得打，閒日的夜晚打比起上次係星期六打平DD…開始試下扔個13磅出去，果然非常厲害…爆開晒D樽，大家的實力不相不仲，唔多唔少，係Kwan腳法不滯…打左三局，我最高而家得12x，而最尾局由阿May贏左，竟然…

奧運~

2008-08-10T20:51:00.004+08:00

今天整天電視也播著奧運，昨天回了公司，今天沒事幹，分別看了網球、單車、跳水，淨單車呢項播足三個鐘，電視的旁述好像沒有進步，有時無野講都應該介紹下個運動員，但無線只介紹出名的多，廢話也特別多，因為好多新人做主持，亞視請黎的教練旁述有時反而講得幾好，不過也算了，睇單車果陣，旁述經常說球員，hmm…用選手都得Gra…不過D比賽都幾正！

沒事幹下Update左個Wiki，而家變左半個相簿咁，有時加d字改下次序，會方便過個Picasa，或者會當成攝影日記。
http://sense.pbwiki.com/

Happy Monday

2008-08-05T00:18:00.003+08:00

就連放工後的時間也拿來耍玩，放左工同同事一行五人去左京士柏網球場打波。食左飯之後捷的士去，不妙的士司機唔知係邊，係京士柏運動場落左車，只好經Q醫行番上去…打風之際本來諗住天氣會好矣，不過竟然刮起涼風，打得非常起勁，不知不覺就過左兩個幾鐘，打完先見到手指有水泡…一段時間無握拍，想握緊D就變左咁喇。打完之後一行人就聽左一位阿姐的指士，行番去旺角，然後就搭小巴歸家。希望Book到場，下次打果陣會更爽啦…

Happy Sunday

2008-08-03T23:44:00.007+08:00

話咁快就星期日，約左Donald 同阿圈去左濕地公園，再去白泥…未去過濕地公園，適逢天氣晴朗，雖然出黎果陣有過雲雨，不過太陽仍然非常厲害…夏天蓮花當造，影下先…

很喜歡這一張，因為構圖我覺得幾靚…

然後仲有一堆朝潮蟹…

好似無乜好影咁，其實係因為好熱，於是四點半左右就離開，搭去白泥…本來諗住係天水圍站搭，跟住見到有人上唔到，去左屏山，再發現唔係好對路，於時去番元朗總站搭，一坐就滿左，架車直去流浮山方向。一去到好多人…仲有人影婚莎相…

影左好耐都影得好暗，相信要Filter先影得好…不過呢張好似影得幾靚…

可惜天公不造美，夕陽沉左入去舊雲到，之後只好影影紅紅的天色…

亦遇見一隻鏡頭放幾近都唔飛走的蜻蜓。

影多陣就走LOO~不過因為人太多上唔到車，要走向總站方向，基本上一行人見我地行就跟左上黎，不過都上到車，八點幾先返到屋企。

濕地公園相簿
白泥日落相簿

Happy Saturday

2008-08-03T23:21:00.003+08:00

星期六一醒左就過左奧海城睇戲…睇下晝場，然後就返番屯門，係返去之前影番張，其實一直都好想影，不過無理由返工係公司樓下影，順路下影左。

之後返到屯門同胡子、2Ming食左個飯，就上左胡子到吹水，吹吹下睇埋狐忍，去到3點幾果陣忽發奇想，一行三人就過左去篤波，一篤就五點幾。

六點搭番輕鐵返屋企，天空出現日出後的Magic Hour，影左一影…

跟住就訓到十二點，去左濕地公園同白泥。

45小時

2008-08-03T23:00:00.002+08:00

終於都打完隻Tales of Symphonia: Knight of Ratatosk，Wii第一隻經典RPG，雖然很多Bug，但係繼承上集，故事又唔錯，不過有3個Ending，而家只係打左一個，雖說可以二周目咁繼續打，但係都無咁多時間，隻Game 6月尾出，我都打左成個月…希望下集會出得好D，故事長D…話說隻Tales of Abyss都打左65hrs。據說十月會出ToA 的Animation，希望佢會真係成套故事咁出，唔會好似之前幾輯Tales of動畫咁，個故事去到中間就停左啦…

周末閒閒…

2008-07-27T22:38:00.022+08:00

星期五On time leave，星期六飛了髮，吃了大大件壽司…唔知點解次次去親果到食都病，雖然只係去左兩次，上次食蟹粥，今次咩都唔理，哈哈哈…然後看了套戲，意想不到的好睇！回家已是零時一點，不過有人就…下次真係要睇下幾點完。

星期日去了書展，十蚊入場，搭車仲貴過佢，而且慳番黎既係排隊的炎熱。一路上…遇上突破火柴人，合照就免了，不過親無人正面影影，還好佢對住鏡頭笑；只買了一本書，應該可以睇一個月。走果陣迫到根本唔會入到去睇書，個個企係到唔郁，漫畫展都無咁多人咁…之後返到屋企，風雲色變，好彩我入左屋先落大雨。

忙忙忙…

2008-07-25T21:20:00.002+08:00

呢個星期非常充實，只怪自己唔識分配時間，邊教野時又要理自己D野，又要對人地的野，加上成個星期都病病地，精神經常唔能夠集中，坐係到入Test Case對Test Case有時都唔知自己對到邊，行開左返番黎又唔記得要Reply人。

「點解？點解？點解？」真係…可唔可以唔好成日問我點解，有時真係感到好煩人，雖然有時知自己教得唔好，講得太快…不過可否換過問法…

最近得到了爪蛙公司的公仔同埋件Jacket，一隻得個鼻的公仔Duke，或者大家講Java只會諗起個茶杯，但係嘗試查找公仔的來源…原來…https://duke.dev.java.net/

小同聚@Cafe

2008-07-20T19:41:00.005+08:00

自主幹攪手潛水後，大家有一年都無約過出黎。今次多得兩位小姐的通力合作，都約左十一個人出黎食飯。雖然想去果間Cafe去唔到，不過琴日食果間都幾好，雖然迫左少少，不過有Wii玩，又可以坐得耐，一坐就四個鐘，隔黎台都換左三批人…

成年無見，一坐底就玩Pictionary，無玩太耐，教到大家唔清唔楚，不過都係睇人地畫的野Je，大家睇怕都有一段日子無渣筆畫野喇，都唔知畫左D咩出黎，不過最差應該係我果幅…玩左兩三Round之後就變左玩UNO，一玩就無轉過Game，可想而知大家玩得幾開心，不停咁做人…下次約定係我到燒野食，唔知到時會係點Loo~

廣州遊

2008-07-12T17:05:00.007+08:00

好耐未上過廣州，上次上去都要數番去中六。琴日成班同事上去番禺野生動物世界，除左荔園果個，都未去過大的動物園。上去的前一日都仲諗緊會唔會落雨，好唔好拎大機上去，估唔到落左咁耐雨，朝早會天晴，係去到下晝差唔多走果陣先有雨落。

因為要玩估動物的遊戲…到步之後，同Teammate商量好答案就決定條路點行，天氣好熱，不太曬，一路行一路出汗，係間唔中有熊貓館同埋樹熊館避暑，唔知係咪天氣太熱，好多動物都坐係到唔郁，除左大象、長頸鹿 etc…

去到大部份地方都可以餵野，當然要俾錢…10蚊俾長頸鹿食左喇~

仲有D要坐「小火車」先睇到的動物…

是次相簿︰http://picasaweb.google.com.hk/Tobias.Ng/XCvsSF

最後都係買左

2008-07-08T00:51:00.003+08:00

今日第二枝鏡入手，買左支AF-S 16mm-85mm，呢個Range 去旅行啱晒，周圍去影相非常方便…不過係新鏡，頗貴~一野用EPS俾晒先平。買完之後就等Donald買埋支70mm-300mm…之後就聽2Ming講去左旺角熟食中心。

等飯到果陣就影下D Lens，左邊係本來果支Kit Lens，中間果支係Donald果支18mm-70mm，右手邊果支係佢啱啱買果支70mm-300mm，雖然好大支，但係同我用黎影呢3支新買的16-85差唔多重…

然後聽2Ming介紹食左個咖喱農包，話說係Open Rice 旺角第二的…好大過食到好飽。

返到屋企先影下買左的呢支鏡個樣…

這是返工後第一次游番水…

2008-07-06T19:00:00.003+08:00

畢業之後，加上搬屋，泳池已經離我好遠…今朝發左癲，Book完場七點幾就搭車去泳池，雖然係想避開多人的九點，不過搭車去屯門泳池，去到都八點幾，或者下次我試下去天水圍會好D。入場果陣都已經好多人，先黎蛙泳，再游自由式…無游咁耐，都仲夠氣~不過左手就攰D，相信係打羽毛球，加上打保齡右手大力左…左手要用多D力黎平衡番。

太耐無入過公眾泳池，好懷念係科大無乜人游水，D水又清的泳池。今朝去到D水的能見到大約係一個身位…池邊堆滿左好多埋怨無太陽的人之餘，仲有好多係大池打橫游的人，不過免費…算了吧。游左唔夠一個鐘就上水，因為人太多，游親自由都會撞到人…差D一野打落人地個頭到，好在佢無反應。一行出個泳池就落雨，無帶遮，就咁就走~ 反正都濕左。唉~又落雨喇……

終於放晴了…

2008-07-01T21:12:00.019+08:00

雖說昨晚也下著大雨，颱風過後的幾天，天氣也不穩定，時晴時雨，今天終於都放晴了。不過雲仍然很大舊，雖然有少少心郁郁出去影相，最後都只係留係屋企。如果部單車返番黎，或者唔會係咁ge~跟手上左屋頂影下這個…

加送夜晚係屋頂試 30秒曝光影的星星…

放假沒事幹…

2008-06-30T21:33:00.003+08:00

這幾天也放假，本想天氣好出去影影相，不過好天與我無緣…間唔史落落雨，而且又有親戚到訪，加上細佬AL放榜，出出入入，總覺得時間過得好快，還好有充足的休息。

今朝去拎回鄉證，閒日的食飯時間去，卻時最多人的時候，企左五分鐘左右，後面多左對父子，想那對父子只企了三分鐘，竟說︰「駛唔駛等咁耐呀，上去攪六四集會咩」，往後佢個仔跑去前面撞到人地，竟跟佢父親說︰「果個人無端端撞埋去我到呀！」跟手佢唔小心踩左我一腳…雖乜野都無講，還好沒有話我無端端踢到佢。

之後就入左下白泥，經過白泥果陣見到日落，真係有D想落車…不過要入去木屋果邊整野。係果邊整野，邊整邊俾蚊針，蚊怕水都不管用，槍林彈雨間只好用蚊怕水浸死手上的蚊。以下係走果陣係下白泥村影左以下兩張，相信影咸蛋黃的人，唔會搭到去咁入吧…

最近潛左呢個彈彈波，十蚊個，很貴~真係潛一個就夠晒，不過係Mario的彈彈波，入面有Mario Galaxy的item，以下係一個彈弓菇係個波入面。細過果陣屋企都有好多，不過好多都飛晒出街…相信係不久的將來，呢個可能會飛落樓下，俾狗食左…

鳳凰山．攝日出

2008-06-22T16:32:00.007+08:00

今晨零時，一行五人攀登鳳凰山，影22號的日出。先搭車去伯公坳，再行緩緩咁行上去。未行過山，除左電筒同水咩都無帶，一路行下停一陣咁行，雖然停的時間唔多，不過花左兩個鐘先上到山頂，上到山頂果陣已經發現有人係到。今日天空無雲，滿天星星，唯獨月光太亮，否則更多星星，而且影的話應該會幾好。

上到山頂的時候已經係零晨的三點九，五點八先日出，就影影機場的夜景，唔知點解去到三點幾都仲有飛機起飛。

由於等日出沒事幹，只好影阿圈的GAS爐，一邊煲水煮杯麵，一邊等…

等到差唔多五點一左右，Magic Hour出現，天空開始見到紅紅地的色，慢慢就開始黃，再開始白，跟住太陽就出左黎，不過太陽一出，D霧就跟埋黎，每次都要等D霧散先影得，而且等緊果陣，部機濕晒，連頭髮都濕埋。

不停咁影，當然相唔會得咁少GE…日出之後天空就好光，而且都無咁凍。隨之而來的就係一片片的雲海，同埋藍藍的天~

可以企高D等自己個影出現係雲層上面，仲有彩虹圈添！到走果陣月亮都仲未Off。

之後我地就一行人聽一個好Pro的大叔話，行去昂坪…行到去都九點，先發現無360坐，好在仲有架的士坐番去…

從來未行過山，其實上山果段路幾攰，太耐無行過樓梯，一路係咁上係咁上，間唔中真係要抖抖，希望下次有機會再上會好D啦~

今次的相簿︰http://picasaweb.google.com.hk/Tobias.Ng/CyFsxH
路線︰阿圈提供的GPS Path

父親入院

2008-06-17T00:16:00.005+08:00

今日食完飯就接到阿爸的電話，說是電單車撞了…之後就同阿媽過左醫院。搵左一陣先搵到阿爸係邊，見到手損晒，甩左骹，很痛的樣子。然後阿爸同阿媽講左句Sorry，感覺還真係有點心酸。不過看似沒事，已經唔太擔心，之後照了兩次X光，醫生說沒有骨節，不過見阿爸訓係到連反身都反唔到，應該好辛苦。之後夜左，佢兩個都叫我返屋企先，後黎阿媽返黎話阿爸拉傷左肌肉要做手術，而家要留院。本來諗住呢幾日補食父親節的一餐，都要再押後。希望會快D好番啦…

Barbecue Day

2008-06-15T21:04:00.003+08:00

好耐未試過一大班人咁燒野食，仲要係屋企咁燒，有D中學時候經常齊嘩嘩係車房燒烤的感覺。十四個人，簡直係挑戰我屋企的容量。雖然屋企預左有人會黎燒野食，不過都未試過，個爐放左係到一段日子，終於都開光。

燒完野食十四個人坐係到的大合照。

攪到大家咁夜，仲差D返唔到屋企，有機會黎真係要早D燒。

放晴之日

2008-06-09T22:35:00.004+08:00

今日放晴，本來琴日已經出返太陽，但係仲有d黑雲係到，不過今日d雲變返白色大大舊，仲有藍天，結果食左Lunch就過左南生圍，估唔到的近…雖然好快去到，但係入面行左好耐，眼見人人踩單車擦身而過，行路好似有點白痴…雖然天色好靚，不過都唔係影得太多，我諗等多人D一齊去先影多D啦…

最後要坐潢水渡過河，5蚊過一次。第一次黎，出返西鐵站先發現，原來係咁近…

影相先黎黑雨…

2008-06-08T12:49:00.003+08:00

琴日本來相約好去南生圍影相，之後再返黎屋企玩，可惜成日都黑雨，結果無去到南生圍。雖然無話特別想去，不過都未去過。話說六點果陣都醒左一醒，睇睇電視，都仲係黃雨，雖然出面好大雨，點知訓到八點幾就變左黑雨，原來六點幾變左黑雨，真掃慶…不過變左成班人早d上黎玩wii 都幾好，尤其係當有人企係wiifit上面俾人影相的一刻，係爭在bbq唔到，次次都食pizza。

雖然早左上黎，但係都去到十一點，好在走果陣無乜雨，係返黎果陣，過左深井就超大雨，大雨到連前面的路都睇得唔係好清楚，後面d 車又近，Keep住只係睇到水潑潑走D水果刻先見到前面少少，都幾驚險…

豈有此理

2008-06-01T20:11:00.003+08:00

香港寬頻的廣告，返到屋企播，西鐵播，巴士播，返工聽，放工聽，食飯聽，每次聽到豈有此理都覺得係精神的虐待…之前佢的廣告都係串緊用ADSL上網的公司，串得黎起碼有內容，呢個簡直令人生厭，當朝早未訓醒，收工好累係車訓，返屋企休息睇電視，都要聽佢重覆幾次的豈有此理，真係覺得好鬼煩……而且，用ADSL無錯丫，佢好似講到錯晒咁，點講都好過幾百戶Share一條光殲。

藍天

2008-05-23T21:26:00.004+08:00

AL兩天，在家休息…不過都有出去Ge…九點左右就俾對面的鳥巢叫醒，唔知幾時開始係對面樓多左個鳥巢，係冷氣下面，每次都想拎相機去影佢，不過每次佢見到就飛走，好難得一張…

下晝過左太古食Lunch，因為個Display係強光下閃爍，再上Nikon CS，結果因為唔影響成像無幫我大Check，Anyway只基於用家原則上去問問。襯時間尚早，又有藍天，就過左尖咀…

滿喜歡上面這兩張，雖然無乜技巧可言…

藍天下的鐘樓，再係海港城停車場影的雙魚星號…

成日影影下都無睇到究竟快門係幾多，錯誤Set左ISO400一直都唔知，希望在陽光普照下的日子，對CCD無太壞的影響。總結，影左一陣就成身汗…

久違的海洋公園

2008-05-19T21:17:00.003+08:00

上次去海洋公園的時候，應該係中七…仲記得唔係假日去，咩機動遊戲都可以玩幾次…隔左幾年再去，玩咩機動遊戲都覺得無咁刺激咁，反而睇動物就睇耐左，影相影耐左…好的動物相難影，尤其係黑的地方，佢唔郁先影到，快門快得滯太暗…加上人群的推撞…好在都有幾張好似幾好Ge…

多謝2ming 的提點，如果唔係我企成日都唔會影到水母…

坐得前就可以好近睇到海豹喇…

兩隻都成個老闆咁的款…

不過影相都只係一部份，一班人一齊去海洋公園真係有幾可…希望下次去佢D新野起好左就好，話說去咁多次，呢次係唯一無搭佢纜車的一次…

杯

2008-05-15T22:49:00.002+08:00

今日一隻用左好耐的杯欄左，雖然已經有一段時間無用，不過見到佢爛左，覺得有D宛惜咁…最近煩的事又返番黎，希望只係一場過雲雨。自言未有盡理屋企的事，因為做人總會自私一點點吧，總不想有被束縛的感覺…

梅窩之旅

2008-05-13T23:12:00.003+08:00

親著母親節的三日紅假，忽發奇想去梅窩踩單車，估唔到大家咁俾面，六個人咁就去梅窩踩單車，係踩之前同Donald過一過昂平，搭下起左咁耐，的昂平360，初初以為百幾蚊一次，結果原來假日正價都係68蚊，比起海洋公園的舒服，夠大夠闊，坐上去可以有自然的風，幾舒服…中途係轉纜點仲見到有Operator係到訓覺，難怪…

昂平市集無乜好影，周圍賣的野都幾貴，賺遊客錢的地方真係唔應該留咁耐，不過因為肚餓係果到食左個意粉。穿過左昂平市集，一出黎就係寶蓮寺，然後就行左上去…

離開左昂平，就搭車落梅窩，仲以為要搭好耐，坐左一陣間就到，係灣灣的山路，巴士風馳電制…唔知點解條路可以行70。會合Jason、Kimmy、Vinna同小悅之後，就係一間「友好」單車店租車，服務態度不值得提，車款不值得提，係出車之前，阿姐仲要話D單車成日唔知點解會斷開，會甩野…結果踩左去銀礦灣瀑布，再上銀礦洞，然後落番沙灘，再過水泥廠果邊的直升機砰…跟住就返東涌食飯…

非常愁閒的旅程，雖然踩到的地方唔係好多，不過好親近大自然…好似小悅咁講︰「好似去台灣咁…」

Java Developer

2008-05-11T23:47:00.002+08:00

無考過Java的Cert，不過要寫Java，大慨只能說是知道Java的Programmer，最近公司要做一個Java Assessment，百五條的MC，Cover的題目幾乎全部都係Java EE的範疇…JSF、Hibernate，也有很多與RAD6有關的課題，開始做果陣，只有頭十條基本Java Knowledge的題目識答，其他的一慨都只能答"Do not know"，一路都只係做Backend 的Java，做FYP也基於Java ME，做份Assessment就好似考天才咁。不竟讀書時只有Java SE學，亦沒有抽時間看Java EE的資料，工作即使用Java亦只處於起步階段…還記得見過一份要求要Java EE的工作，Interview的時候問好多Servlet的野，只有懂一半一半，那時還Dig起心肝去考Cert，不過搵到工後就打消念頭，而家更加置之度外…如果呢個Java Assessment，真係好似佢咁講…會Classify人做"Require Training"而又真係俾Training，咁就好…不過就算真係基於果堆題目的Training，在現處的工作環境下，根本唔會用到…

新住客

2008-05-03T00:18:00.002+08:00

最近中間果層賣左出去，銀主盤一減再減78萬，700尺，十年樓，初初以為係一對老夫婦住，結果租左俾人，有一對好後生的男女租左，睇個樣仲後生過我，Hmm…佢地養左隻狗，每日我返黎都隔門吠我…

話說我成日都唔係屋企，早返工，夜收工，住係地下果家人都幾乎未見過我，琴日出去同屋企人食飯，佢地先至見到我，因為我同我細佬一樣高，或者應該係佢高過我，佢地差d叫左我係佢，不過而家應該認得…Anyway佢屋企果兩隻狗，我就日日都見…

見到地下果家人，其實都見埋搬黎無耐的租客，我mom叫我叫佢李生，還覺得滿奇怪的介紹，因為看上去佢細過我咁，佢的伴侶我又無理由叫李太=.=…最後佢都無講自己叫乜，不過住係地下屋主個女突然介紹自己…我先醒起我都未講自己叫咩=.=。

洗CCD

2008-05-02T22:40:00.003+08:00

前日拎起部D60，一影之下發現…相片中多了幾點，fo遠野fo近野，Zoom遠zoom近，粒點的位置都係唔變，再變下個光圈，大光圈下黑點Blur左，好似有黑斑咁，小光圈到到f36，就見到成粒野痴左係到咁，問左好多人，多謝大家的意見…最後今日Lunch果陣拎左上Nikon的顧客服務中心到Check…

好在Lunch上面一個人都無，唔駛等，一同個Staff講有點點，佢就問係咪灰灰地咁，俾埋相佢睇，二話不說就指係CCD污漕，買左才一個月，唔駛錢洗CCD，因為要等45分鐘，所以放左工先上番去拎。為免放工多人，個Staff係咁講的，六點走…Hmm…幾乎係最早走果個，結果上到去都係無人。試下部機，特登再用f36，發現點的位置變左@@，不過係少左ge，問佢可唔可以再洗，出返黎，又有兩粒，雖然人地就快收工，但係…再洗，個Staff話我用咁細光圈check，不過都再幫我洗，最後出黎有粒佢話係Filter到話洗好麻煩，啱啱係佢地的收工時間，免為其難拎番部機就走…不過如果唔係用咁細光圈都唔會見到ge…

返黎果陣搭巴士，有個印度的小朋友…唔其實應該係初中生問我借電話，係巴士到，借左唔會走左去吧，有著香港人都有的想法，借左俾佢用，Touch Screen佢唔識用，教埋佢用，不過佢打出去果陣打埋133，我諗無乜小朋友咁醒吧…之後係巴士到Liu我講野，哈…

台南之旅

2008-04-26T13:06:00.005+08:00

去完旅行之後一直都好疲倦，或者係行得太多吧，周圍咁走，不過仲累過去歐洲果次。Upload左d相上facebook 之後，整理一下相簿再upload上Picasa。今次去旅行帶左部D60加埋一路用開的R6，影左返黎的相算係咁吧，話晒用單鏡都係新手。

頭兩日去左高雄，一落機就唔識搭車去酒店，發現Search返黎的巴士路線原來已經無左，或者係因為捷運開左，Cut左，之後搭去酒店都用左D 時間，最後係高雄搭的士多，不過除番其實都係差幾蚊。

第三日租車連司機去墾丁，差唔多到墾丁果陣就開始落雨，十一點幾去到，D雨就一直落到兩點，好在之後開始轉晴。係酒店放低野就俾個司機掉底係墾丁國家公園，因為落雨無入到去，食左成個旅行入面最差的一餐，然後就落南灣，再過墾丁街。好在天氣好轉，係小灣可以落一落水，第二日周圍的風景都好正，淨係望住個海都覺得好舒服。

最後一日坐番車返高雄，搭火車去左台南市，感覺上台南市比高雄好好多，至少感覺無咁鄉下，條街都多好多人，而且景點好似比較集中，因為唔夠時間，食左度小月擔仔麵之後就係安平區附近行行，有好多食得的手信可以買，老街有好多野睇，唯恐趕唔切機，留左一個鐘左右就返番高雄，不過班機Delay左…

台南之旅相簿

Mistake

2008-04-13T00:03:00.002+08:00

Mistake...What a foolish mistake I have made. 自言也是一個粗心大意的人，很多時只係有得補救，或者有時間去補救，不過琴日真係一個Ctrl V + 一下Enter 就Delete左人地D Source…個心真係寒左一寒，我諗我以後都唔會再用果個Command…不過呢排做野，人有點點亂，開始做做下呢樣又走左去做果樣，排Task次序又排得亂…

開封

2008-04-04T13:56:00.003+08:00

幾部Figure 終於都開封，好想整個display櫃放佢地入去，如果唔係放一兩日已經漬左D塵係到，不過整晝櫃果陣又無諗過係佢下面加個display櫃，暫時都係就咁放佢地係張枱到，得閒先諗下點擺…

新寵物

2008-03-30T22:14:00.002+08:00

最後屋企都係添置左隻狗係天台，如果佢聽教聽話應該會長住吧，希望佢生性啦！識得知「訂」去廁所就Very Good喇，話說呢隻狗仔無父母，我老豆唔知係邊執佢返黎，有少少沙皮狗的樣子…